DILI 11 jullu 2023 (TATOLI) – Diretór Gabinete Relasaun Externa no Komunikasaun-Autoridade Protesaun Sivil (APC, sigla portugés) Anacleto Caetano, informa Estudante Joanico da Costa hosi Eskola Ensinu Báziku Sentrál Odofuro, ne’ebé mak mota lori iha segunda-feira, (03/07), iha Munisípiu Lautém, to’o agora seidauk hetan.
“Ita-nia alin oan ida ne’ebé mak mota lori iha Lautém, Autoridade Protesaun Sivil, Munisípiu Lautém konfirma katak to’o oras ne’e ekipa APC Lautém kontinua servisu hamutuk ho PNTL, Bombeirus no autoridade lokál no komunidade sira kontinua buka tuir sidadaun ne’e”, Anacleto Caetano ba Agência TATOLI, via telefone, tersa ne’e.
Caetano rekorda, dezastre naturál hamosu inundasaun hodi rezulta ema na’in-tolu mak mota lori no hetan ona nia mate isin, hirak ne’e, hosi ida hosi Munisípiu Ainaro, Bobonaro no Covalima.
“Mate isin ida ita hetan iha Ainaro, ida ita hetan iha Bobonaro no ida mak hetan iha Covalima. Agora tau hela iha óspital referrál Suai. Ita-nia matebian ne’e sei deskoñesidu tanba to’o agora família balun seidauk mai foti no agora sei iha hela óspitál Suai”, nia informa.
Nia subliña, inísiu fulan jullu, APC rejista Uma Kain 653 mak afetadu ba inundasaun, hirak ne’e hosi munisípiu 11.
“Hosi númeru ne’e, uma ne’ebé estragu naton hamutuk 159, uma ne’ebé hetan estragu kaman 366, enkuantu uma ne’ebé hetan estragu totál hosi inundasaun hamutuk 264 ne’ebé tama iha kategoria atu hetan apoiu rekoperasaun”, nia friza.
Nia adianta, ekipa APC iha munisípiu kontinua hala’o levantamentu dadus ba uma ne’ebé hetan estragus total ho objetivu identifika hodi hein prosesu apoiu rekoperasaun ba vítima sira-nia hela fatin.
Nia esplika, vítima sira ne’ebé uma hetan estragu totál sei hetan apoiu rekoperasaun ba hela fatin ho totál orsamentu, kada vítima ida nia uma ho osan montante $1000, inkliu pakote ekipamentu hanesan ai, kalen no besi.
vítima sira ne’ebé uma hetan estragu naton, sei hetan apoiu rekoperasaun ho totál orsamentu $ 600, inkliu pakote ekipamentu ba kontrusaun tuir tipu ne’ebé iha. Vítima sira ne’ebé nia uma estragu kaman hanesan be’e tama sei la hetan apoiu orsamentu, maibé sira iha direitu atu hetan apoiu emerjénsia hanesan Ai-han nesesidade bázika no la’os ai-han.
Tuir Dekretu Lei Númeru 7/2021 kona-ba medida protesaun sidadaun ne’ebé define klaru kona-ba tipu apoiu uma ne’ebé hetan estragu totál hosi inundasaun no estragu kaman no uma ne’ebé mak be’e tama de’it maibé depois sira sei hetan de’it apoiu emerjénsia.
Notísia relevante : Família buka tuir hela estudante mota lori iha Lautém
Jornalista: Natalino Costa
Editór : Zezito Silva
