BOBONARO, 22 jullu 2023 (TATOLI)—Diretór Nasionál dezenvolvimentu Kooperativa Finanseira hosi Sekretaria Estadu Kooperativa (SEKoop), Reinaldo Borges, sábadu ne’e, fó pose ba estrutura Kooperativa Kréditu Lakon Nakukun Mosu Naroman (LANAMONA), iha ámbitu selebra ezisténsia tinan-15 nian.
Iha biban ne’e, Diretór parabeniza estrutura no membru kooperativa hotu no husu bainhira halo servisu labele haree ba koor no rasa, atu nune’e bele dezenvolve LANAMONA ho di’ak.
“Iha kooperativa la koñese koor partidu, ita-nia partidu ne’e buat ketak ida, ita tenke dehan bainhira hau tama iha odomatan, buat sira ne’e ami tau iha kotuk no rai iha uma tanba kooperativa iha identidade rasik hanaran definisaun, prinsípiu, valór, pilár no filosofia, katak kooperativa hahú hosi rai-ulun to’o rai-ikun, halibur ema hotu hodi haburas ba nafatin,” Diretór hosi SeeKoop hateten iha sede kooperativa uniaun LANAMONA, suku Odomau, postu Maliana, munisípiu Bobonaro.
Notísia relevante : Grupu kooperativa LANAMONA iha kapitál millaun $1-resin hosi membru 2.120
Reinaldo Borges husu ba estrututra atu sai eroi foun ba kooperativa hodi kontinua Saudozo Nicolau Lobato nia obra, hanesan fini ida ne’ebé hahú harii kooperativa ida iha Fahi-Lebu no Bazartete iha munisípiu Liquiçá no Vicente Reis ne’ebé harii kooperativa ida iha Loiluhu, Baucau maski iha situasaun difisil.
Nia enkoraja estrutura no membru sira tomak atu servisu maka’as tanba SEKoop fó prioridade liu ba produsaun hodi fornese ba merkadu espesífiku sira hodi hala’o programa hanesan merenda eskolar, saúde no ba FALINTIL –Forsa Defeza Timo-Leste (F-FDTL).
“Hau rona imi 7% de’it mak hola parte iha kooperativa, signifika katak 93% ne’e ema agrikultór. Imi iha produsaun prepara iha 28 novembru ita sei iha espozisaun ida ba lansa produtu kooperativa, iha Palásiu Prenzidente nia kotuk, inklui sei koordena ho CLN (Sentru Lojístika Nasionál) atu sira mak distribui ba merkadu,” nia tenik.
Iha biban hanesan, Prezidente LANAMONA, Domingas dos Santos, agradese ba fundadór, jestór no membru sira hotu tanba konsidera ezisténsia ba dala-15 ne’e nu’udar esforsu koletivu ida.
“Bebé ida moris, tuur, dolar, la’o to’o ona tama ona adolesente, daudaun tama ona to’o Gleno Ermera, Aileu no Dili kuaze maioria, karik ita esforsu nafatin ho konsistente no kompromisu maka sei hakat atu hetan naroman ba Timor tomak,” nia tenik.
Nia kompromete sei servisu hamutuk ho estrutura tomak, la haree ba koor partidu no relijaun, nune’e bele dezenvolve kooperativa ne’e no hadi’a povu nia moris.
Prezidente Kooperativa agradese ba SEKoop, Governu lokál, Autoridade seguransa, líder komunitária no entidade hotu ne’ebé durante ne’e apoia atividade LANAMONA.
Serimónia ne’e partisipa hosi Sekretáriu Autoridade munisípiu Bobonaro, João de Fátima do Carmo, Reprezentante Komandante PNTL munisípiu Bobonaro no membru sira hosi Ermera no Aileu.
Jornalista : Sérgio da Cruz
Editora : Julia Chatarina
