DILI, 27 jullu 2023 (TATOLI) – DILI, 27 jullu 2023 (TATOLI) – Jornalista seniór hanesan mós na’in ba media Timor Post, Santina de Araújo, hato’o parabéns ba Ajénsia Notisiosa Timor-Leste, Institutu Públiku (TATOLI, I.P), ne’ebé selebra aniversáriu ba dala-VII no louva servisu jornalista na’in hitu ne’ebé hahú embriaun Ajénsia notisioza Timor-Leste (ANTIL) iha tinan 2016 to’o ANTIL nakfila ba TATOLI, Institutu Públiku (I.P).
“Parabéns ba Ajénsia TATOLI ne’ebé mak selebra aniversáriu ba dala-VII, maske idade sei kiik, maibé hahú ho jornalista na’in hitu ne’ebé poténsia tebes hodi lori TATOLI to’o ohin loron,” Diretora sesante Timor Post, Santina de Araújo, bainhira partisipa aniversáriu TATOL,I.P iha edifísiu TATOLI, Farol, Dili, kinta ne’e.
Jornalista na’in hitu ne’ebé hanesan jornalista da-uluk iha TATOLI mak hanesan, Manuel Pinto, Xisto Freitas da Piedade, Rita Almeida, Rafael Ximenes de A. Belo, Zezito Silva, Maria Auxiliadora Freitas no Julia Chatarina Lapudooh.
Jornalista na’in hitu ne’e hahú hala’o knaar bainhira embriaun Ajénsia Notisioza Timor-Leste (ANTIL), ofisialmente, lansa husi Primeiru-ministru dr. Rui Maria de Araújo, iha 27 jullu 2016. No, tempu ne’ebá Sekretáriu Estadu Komunikasaun Sosiál (SEKOMS) mak Nélio Isaac Sarmento.
Kriasaun Agência Tatoli bazeia ba dekretu-lei númeru 21/2017, 24 maiu, hanesan ema koletiva ne’ebé iha direitu públiku ho natureza institutu públiku.
Ajénsia Estadu ne’e hetan aprovasaun iha reuniaun Konsellu Ministru no públika iha Jornál Repúblika iha loron 14 marsu 2016, nu’udar embriaun ho naran ANTIL ne’ebé lansa iha 27 jullu 2016.
Ezisténsia Agência TATOLI mak sai fontes informasaun ofisiál Estadu Timor-Leste ne’ebé iha kapasidade no kbit elabora informasaun ba públiku iha eskala nasionál, rejionál no internasionál.
Vizaun no misaun TATOLI,I.P
Vizaun
Sai “trend –setter” fontes notísia no informasaun nasionál ne’ebé iha kualidade, krédivel no nesesitadu husi públiku utilizadór informasaun.
Misaun
- Fornese produtu notísia ne’ebé mak públiku utilizadór informasaun jerelmente presiza.
- Atende nesesidade informasaun públiku utilizadór informasaun ho karakter antesedente, indepth, klasifikadu no “taylor-made information” no self users assigment.
- Sai produtór no jestór informasaun no dokumentasaun nasaun.
- Sai produtór filme no dokumentasaun nasaun.
- Sai organizadora funsaun “ information clearing house”.
- Sai órgaun opiniaun públiku .
- Hala’o funsaun instituisaun peskiza no dezenvolvimentu komunikasaun aplikada.
- Sai “state public relations”.
- “State agent of information”.
- “ Flag carrier” Timor-Leste nian.
- Realizadór fórum informasaun públiku.
Objetivu
- Estabelese ajénsia Estadu Timor-Leste mak sai fóntes informasaun ofisiál Estadu Timor-Leste ne’ebé iha kapasidade no kbiit elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál.
- Nu’udar implementadór konstituisaun ne’ebé sai dever governu nian atu fó servisu oferesimentu informasaun ne’ebé kredivel no loos nomós sai direitu informasaun sosiedade Timor-Leste ne’ebé garantidu husi artigu 40 no 41 konstituisaun Timor-Leste nian.
- Nu’udar instituisaun komunikasaun informasaun, Ajénsia TATOLI.IP la’ós de’it sai produtór informasaun maibé mós bele iha papél nu’udar “National infórmation clearing house” ne’ebé iha tarefa fó klarifikasaun no informasaun serteza, halakon misinformasaun no disinformasaun. Bele sai nu’udar “área istória” no “eskritór istória” pátria, nasaun, sosiedade no mós nu’udar “maklibur no fornesedór informasaun públiku”.
- Ajénsia notisioza TATOLI.IP nu’udar padraun minimál kompeténsia jornalístika ba jornalista Timor-Leste ne’ebé sempre bele produz produtu informasaun-kareira jornalístika ne’ebé iha kualidade tuir dinámika sosiál no nesesidade informasaun sosiedade nian.
- Fenómena no dinámika sosiál” ho “dinámika komunikasaun” ne’ebé estimula ho dezenvolvimentu teknolojia komunikasaun-informasaun lori konsekuénsia iha Timor-Leste ho paradigma nesesidade informasaun públiku iha ne’ebé TATOLI nu’udar ajénsia notísia nasionál Timor-Leste ne’ebé la’ós de’it ezije atu bele fornese pakote informasaun iha kontextu “mainstream” maibé iha futuru bele mós obrigadu produz informasaun alternativa ho karakter “taylor made” ne’ebé propoen husi utilizadór informasaun determinada.
Notísia relevante:Falta rekursu difikulta TATOLI sai “trend-setter no clearing house”
Jornalista : Hortencio Sanchez
Editór : Rafael Ximenes de A. Belo
