DILI, 31 jullu 2023 (TATOLI)–Institutu Nasionál Estatístika Timor-Leste, Institutu Públiku (INETL, I.P) servisu hamutuk ho Banku Dezenvolvimentu Aziátiku (ADB, sigla inglés), realiza formasaun ba funsionáriu INETL hamutuk na’in-20 kona-ba rekolla dadus estatístika ho kualidade.
Prezidente INETL, Elias dos Santos Fereira, hateten, molok formasaun ne’e realiza iha diskusaun entre ADB no INETL iha tinan rua liubá, maibé tanba pandemia COVID-19 nune’e la konsege no foin realiza iha tinan ne’e.
“Objetivu formasaun ne’e maka atu dezenvolve fonte estatístika foun no aumenta kapasitasaun ba INETL nian funsionáriu iha fonte dadus foun inklui teknolojia ne’ebé uza iha implementasaun hodi kompila ba ‘Supply and Use Table (SUT)” ho presu esistente ba Timor-Leste,” Jerente institutu dehan iha ámbitu abertura formasaun, iha salaun INETL, Caicoli, segunda ne’e.
Formasaun realiza durante semana rua, hahú hosi loron 31 jullu no sei ramata iha loron 11 agostu 2023, enkuantu formadora mai hosi ADB Manila maka, Arishi Gupta, Sarah Mae A. Manuel no Ana Francesca Rosales.
Notísia relevante : Dadus estatístika hatudu populasaun Timor-Leste presiza aumenta
Aleinde ne’e, sei iha mos sesaun diskusaun durante atividade ne’e inklui mós hasoru malu ho personalidade ho instituisaun relevante sira hanesan Banku Sentrál Timor-Leste, Autoridade Nasionál Petróleu no Minerál, Ministériu Saúde, Ministúriu Turizmu no seluk tan, ho intensaun katak haree mós dadus ne’ebé INETL kompila liga ho produsaun estatístika ekonomia hodi publika konta nasionál anuál.
“Asesu dadus estatístika ekonomia ne’ebé kompila hosi INETL ne’ebé iha konkordánsia ho framework ho padraun internasionál,” nia akresenta.
Iha biban hanesan, Xefe delegasaun no formadora, Arishi Gupta haksolok tanba bele mai Timor-Leste hodi fó formasaun ba funsionáriu INETL ne’ebé planu ne’e hahú kedas iha tinan 2021.
“Agradese ba INETL ne’ebé mak simu ona no konkorda hodi ita organiza hamutuk formasaun ne’e, ne’ebé to’o ikus sei benefisia funsionáriu INETL. Ami mos sei mai haree dadus ne’ebé mak iha no apreende mós buat balun ne’ebé kompila hosi institutu,” formadora tenik.
ADB mós sei servisu hamutuk ho Australian Bureau of Statistics (ABS) hodi fó formasaun kle’an liu ba funsionáriu INETL tuir nesesidade ne’ebé instituisaun Estadu ne’e presiza.
Jornalista : Antónia Gusmão
Editora : Julia Chatarina
