DILI, 07 agostu 2023 (TATOLI)—Sentru Lojístika Nasionál (CLN, sigla portugés), iha segunda ne’e, hahú halo intervensaun merkadu atu responde ba kondisaun folin foos importasaun sa’e maka’as iha munisípiu balun, semana ikus ne’e.
“Hahú ohin, ita halo intervensaun ba merkadu liuhosi tula foos ba munisípiu ne’ebé ita identifika ona atu halo intervensaun direita” Diretór Transporte no Lojístika iha CLN, Tito da Costa, informa ba Agência Tatoli, iha ninia knaar fatin, Bebora, segunda ne’e.
Notísia relevante : Ministru Nino Pereira konfirma stock foos iha armazen empreza importadór
Munisípiu ne’ebé daudaun CLN identifika atu halo intervensaun ne’e hamutuk neen inklui Rejiaun Administrativa Espesiál Oé-cusse Ambeno (RAEOA).
CLN halo intervensaun merkadu ho maneira tula foos hodi rai ba komunidade nia le’et, fa’an direitamente ba komunidade ho folin tun hanesan foos 35kg ho folin $15 no foos 25kg folin $12,50.
“Ita halo intervensaun ho foos rai tanba foos importasaun iha armazen hotu. foos ne’ebé agora ita halo intervensaun ne’e hamutuk tonelada 2.200, ita garante katak intervensaun ne’ebé ita halo ne’e bele sufisiente,” nia akresenta.
Sentru nasionál halo la halo intervensaun iha Dili no munisípiu sira ne’ebé besik Dili, maibé halo intervensaun ba de’it munisípiu sira ne’ebé dook hosi kapitál Dili.
“Fulan ida-ne’e ita halo intervensaun direita maibé ba fulan oin ita loke konkursu públiku ba empreza sira mak ida ne’ebé manán mak sei halo intervensaun ba merkadu,” Tito tenik.
CLN uza transporte hitu hori halo atividade, ne’ebé hahú ohin tula uluk ba Manufahi no Covalima no iha munisípiu seluk. CLN sei halo intervensaun iha munisípiu neen hanesan, Manufahi, Covalima, Bobonaro, Viqueque, Baucau, Lautém no RAEOA.
Jornalista : Arminda Fonseca
Editora : Julia Chatarina
