DILI, 08 agostu 2023 (TATOLI)–Ministru Asuntu Kombatente Libertasun Nasionál (MAKLM), Gil da Costa Monteiro “Oan Soru”, hateten polítika MAKLN konstrui monumentu ba erói sira iha postu administrativu ida no valoriza liuhosi hakerek erói sira-nia naran iha monumentu ne’e nia lolon.
Notísia Relevante: Governu tau fatuk dahuluk konstrui monumentuu Palásiu Prezidensiál Rezisténsia Ermori
“Atu labele lakon valór ida ba ita-nia erói sira, mak polítika ida ita dehan halo monumentu iha postu ida hodi hakerek eroi postu ida nia-oan sira hotu nia naran iha monumentu ne’e. To’o loron boot, loron nasional ba erói, ita hotu-hotu ba halibur malu hodi halo reflesaun no fó omenajen iha fatin ida de’it,” Oan Soru hateten ba Agência Tatoli iha nia kna’ar fatin, Caicoli, segunda ne’e.
Tanba, Oan Soru hatutan, liuhosi monumentu ida mak família erói sira bele koñese malu no bele halo reflesaun ba malu.
“Hosi ne’e mak erói nia oan sira koñese malu, hodi dehan ba malu afinal ita-nia família hotu-hotu mate ba rai ida-ne’e. Ne’ebé, iha rekonsiliasaun psikolojikamente sira bele hasoru malu hodi bele halo refllesaun. Ida-ne’e mak bele akontese iha kada postu ida,” nia dehan.
Jornalista : Osória Marques
Editór : Cancio Ximenes
