COVALIMA, 25 agostu (TATOLI)—Autoridade Covalima liuhosi Sekretáriu Administrasaun, Francisco de Alves, apresia Muzeu Memoriál Covalima promove livru istória Timor-Leste liuhosi loke feira, iha ámbitu komemorasaun loron Konsulta Populár ba dala-24 (30 agostu 1999-30 agostu 2023) iha suku Suai Loro, postu administrativu Suai, munisípiu Covalima.
Notísia Relevante: Konsulta Populár: Timoroan hamutuk prega metin “Ukun Rasik-Aan” ho “Pregu”
“Ita-boot sira haree, Muzeu Memoriál Covalima esforsu hodi promove livru istória Timor-Leste pamfletu, imajen (foto) no seluk tan iha atividade loke feira,” Francisco de Alves hateten ba Agência Tatoli iha AMC, sesta ne’e.
Autoridade Covalima loke feira ho intensaun atu anima komunidade no mós atu promove produtu lokál sira kada postu administrativu no mós diretór munisípál bele promove durante hala’o servisu.
Realidade, nia dehan, iha atividade feira hatudu diretór munisipál no administrasaun postu administrative la promove sira-nia servisu, maibé hosi parte Muzeu Memoriál Covalima mak promove livru istória Timor-Leste nian liuhosi livru sira-ne’ebe Comissão Acolhimento, Verdade e Reconciliação (CAVR) prodús.
Funsionáriu Muzeu Memoriál Covalima, Paulo de Araújo, hateten bazeia ba ninia observasaun durante promove livru istória Timor-Leste ne’e, vizitante sira maiória hosi inan-aman, profesór no autoridade sira mai vizita maibé joven sira ladún iha vontade atu lee livru istória Timor-Leste nian.
“Durante ami halo espozisaun kona-ba livru hosi Muzeu Memoriál Covalima lá’ós promove livru de’it maibé promove mós ami-nia pamfletu sira. Ita-nia estudante no joven sira menus lee livru, maibé maiória inan-aman no profesòr sira mak lee livru,” nia hateten.
Aleinde promove livru, Muzeu Memoriál Covalima mós promove pamfletu hakerek narrativa ho klaru kona-ba autór sira ka vitima sira hetan sofrimentu iha tempu pasadu-okupasaun Indonézia, ne’ebé foku liu ba istória Masakre Setembru Negro 1999 iha Suai.
Pamfletu seluk, haktuir kona-ba istória hahú Indonézia invade Timor-Leste durante tinan 24 nia laran, nune’e joven sira no ema idultu sira vizita fatin ne’e no lee livru hodi buka hatene istória Timor-Leste nian ho loloos no momoos.
“Ita-nia inan-aman no joven sira vizita no haree pamfletu katak ita-nia luta libertasaun la’ós apenas ukun aan de’it, maibé iha prosesu defísil nia laran,” nia hateten.
Muzeum Memoriál Covalima promove livru sira iha feira ne’e mak hanesan istória Timor-Leste hahú 1974 to’o 1999 ne’ebé CAVR prodús liuhosi fonte CAVR hala’o Audiénsia Públika tématika sira kona-ba Prizioneiru Polítika, Konflitu Partidu Polítika, Muda Ema Obrigatóriu, Labarik iha Konflitu, Feto iha Konflitu, no livru versaun popular hosi relatóriu CAVR “Chega!”.
Aleinde ne’e, Muzeu Memoriál Rezisténsia Covalima mós promove livru biografia líder istóriku hanesan audozo Francisco Xavier do Amarál, Saudozu Nicolao Lobato dos Reis no auto-biografia hosi KOmandante em Xefe FALINTIL no atuál Primeiru-Ministru, Kay Rala Xanana Gusmão, no livru sira kona-ba akontese masakre iha Timor-Leste.
Notísia Relevante: Romo Mangunwijaya kontribui influénsia BJ Habibie fó referendu ba Timor-Timur
Jornalista : Celestina Teles
Editór : Cancio Ximenes
