BOBONARO, 23 outubru 2023 (TATOLI)-Korpu Guarda Floresta (CGF,sigla portugués), munisípiu Bobonaro sei servisu hamutuk ho komandu Polisia munisípiu hodi halo operasaun konjunta hasoru komunidade sira ne’ebé kontinua tesi-ai, sunu rai, no kasa animal fuik iha aréa protezida sira.
Xefe Departamentu Reprezentasaun Teritoriál Floresta no Plantasaun Munisípiu Bobonaro, Martinho Bili-Mau, hateten operasaun ne’e bazeia ba orientasaun hosi diresaun nasionál hodi prevene sidadaun sira atu labele sunu-du’ut, tesi-ai arbiru no kasa animál fuik, ne’ebé tuir planu sei hala’o iha fulan-outubru 2023.
Maibé, nia informa antes atu realiza operasaun konjunta ne’e, ekipa sei sensibiliza uluk informasaun ba komunidade sira atu oinsá fó protesaun ba animal fuik, labele sunu rai no tesi ai-horis arbiru.
“Ita pasa informasaun tiha mak ita hetan sei foti hotu liu-liu ba Senapan (kilat manu) sira inklui mós mákina sensór sira ne’ebé la mai rejistu, karik ita hetan sei halo atuasaun,” nia hateten ba jornalista sira iha ninia servisu fatin, Maliana, segunda ne’e.
Nia relata durante ne’e, komunidade sira barak laiha konsiénsia hodi sunu rai no tesi ai-horis arbiru iha aréa protezida iha suku Leber, Tapo, aréa Foho Loe-Laco, Cailaco, Balibo no Seluktan.
No hosi rezultadu servisu vizilansia Korpu Guarda Floresta foinlalais konsege detein sidadaun mane ida iha aldeia Bucuk, suku Leber hodi entrega ba PNTL eskudra postu administrativu Bobonaro.
“Ita hein ninia prosesu kultura ne’e oinsá, depois ita kontinua prosesu tuir lei tanba ita iha ona lei sunu du’ut ne’e krimi”Martinho afirma.
Atu evita sunu rai, tesi ai-horis no kasa animal fuik arbiru maka nia apela ba komunidade sira ne’ebé hela besik aréa protezida sira atu proteje meiu ambiente hodi evita tesi ai-horis, sunu rai no kasa animal fuik.
“Impaktu hosi sunu duut ne’e mak, primeiru ita-nia animál orijinál sira ita kuidadu hanesan rusa sira ne’e bele halai lakon imigran ba nasaun seluk, segundu mak ular-oan sira iha rai okos ne’e lori tranformasaun ba rai ne’e mate hotu, entaun udan mai nia labele halo rai mamar para ita kuda aihan, terseiru ai-oan ne’ebé ita kuda no balun ne’ebé hein udan mai atu morís ne’e mós mate hotu”Nia hateten.
Entertantu, tuir dadus CGF Munisípiu Bobonaro ne’ebé halo vizilansia iha área protézida hamutuk hamutuk ema-20 resin, kompostu hosi postu administrativu Loloto’e na’in 2, Bobonaro 6, Balibo 3, Atabae 4, Cailaco 4 Maliana nain 6.
Notísia Relevante:PNTL fasilita formasaun ba Guarda Florestál nain-46
Jornalista: Sergio da Cruz
Editór:Agapito dos Santos
