iklan

BOBONARO, INKLUZAUN SOSIÁL, MUNISÍPIU

Lideransa komunitária Maliana muda edifísiu defisiénsia bá Tunubibi

Lideransa komunitária Maliana muda edifísiu defisiénsia bá Tunubibi

Autoridade lokál suku Lahomea no suku Tapo-Memo,inklui jestór programa sira halo inkontru hodi diside muda Edifisíu Asosisaun Halibur Defisiensia Rejiaun Oeste iha Bairu Buracha Laran ba fali aldeia Tunubibi. Imagen TATOLI/Sergio da Cruz

BOBONARO, 25 outubru 2023 (TATOLI)-Lideransa komunitária hosi suku Lahomea no Tapo-Memo, postu administrativu Maliana, tersa horiseik asina ona termu entrega hodi muda edifísiu Asosiasaun Halibur Defisiénsia Rejiaun Oeste (AHDRO) hosi Bairu Boracha Laran, aldeia Maliana bá fali edifísiu permanente iha aldeia Tunubibi Bobonaro.

Jestór programa AHDRO, Delfina Gomes Lopes, justifika durante ne’e, nia parte uja fatin provizóriu iha aréa Buracha-Laran, maibe daudaun ne’e, kondisaun infraestrutura komesa aat no uma-nain mós ejize atu asosiasaun ne’e hamamuk ona fatin ne’ebá.

“Sira hakarak muda ona ba Tunubibi entaun ami husu atu simu defisiénsia sira hela permanente iha fatin ne’ebá tanba fatin ne’ebá luan no mós sira bele halo dezenvolvimentu liuliu forma grupu hodi kuda modo no buat oioin ne’ebé sira hakarak halo ba sira-nia atividade lorloron,”Nia hateten ba jornalista sira iha antigu edifísiu ADHRO.

Notísia Relevante:AHDRO husu AMB prioriza asuntu defisiénsia iha OJE 2024

Iha fatin hanesan Xefe Suku Lahomea, Cirilio Letomau, agradese ba autoridade suku Tapo-Memo liu-liu xefe aldeia Tunubibi ne’ebé ho laran luak entrega rai ba asosiasaun hodi harii ninia edifísiu permanente atu nune’e bele akumula sidadaun sira ne’ebe iha kondisaun defisiénsia fiziku.

“Imi bele muda hosi suku Lahomea bá suku Tapo-Memo, maibé imi la muda hosi ha’u-nia prezensa tanba durante tinan lima imi iha ne’e sa difikuldades no dezafíu ne’ebé mak imi hasoru ita mak hamutuk hodi rezolve oituan ka barak,”Nia dehan.

Nune’e mós Xefe Aldeia Tunubibi Suku Tapo-Memo, Fernando Raul, hateten maske mandatu nu’udar xefe aldeia sei termina iha loron 28 fulan-outubru 2023, maibé nia promete atu kontinua fó apoiu ba asosiasaun ne’e hodi promove no dezenvolve diretu ema ho defisiénsia sira-nian.

“Ita-boot sira-nia prezensa hanesan Goresan memoria ida mai ha’u tanba durante ne’e ha’u koko fó fatin ba AHDRO agora iha uma maske simples maibé ba ha’u ne’e sufisiente ba ita-boot sira atu halo atividade no hela iha ne’ebá, ha’u espera ita-boot sira sei halo buat ida benefisia ba rai ida ne’e,” nia hateten.

Tuir relatóriu edifísiu foun ne’e ho medida luan metru 6 no naruk metru 9, iha kuartu tolu ne’ebé konstrui iha rai mamuk ne’ebé maka abandona ka la utiliza. Komunidade sira maka kontribui harii edifísiu ne’e hahú iha tinan 2022 liubá tanba hetan apoiu orsamentu hosi hosi Asosiasaun Halibur Defisiénsia Timor-Leste (AHDTL).

Entertantu, Asosiasaun Halibur Defisiénsia Rejiaun Oeste (AHDRO), ho ninia funsionáriu hamutuk 39, no asosiasaun ne’e halibur ona ema defisiénsia hamutuk 300-resin ne’ebé akumula hosi munisípiu Bobonaro, Liquiça no Covalima.

Notísia Relevante:Ema ho defisiénsia na’in-40 iha Bobonaro asesu ona subsídiu

Jornalista: Sergio da Cruz

Editór: Agapito dos Santos

iklan
iklan

Leave a Reply

iklan
error: Content is protected !!