DILI, 26 outubru 2023 (TATOLI)–Komité Revizaun Orsamentu (KRO) ba Orsamentu Jerál Estadu tinan fiskál 2024 aseita ona pedidu adisionál hosi Ministériu Komérsiu no Indústria (MKI) ho montante millaun $1-resin.
Ministru Komérsiu no Indústria, Filipus Nino Pereira, hateten, Ministériu Finansa fahe pakote fiskál millaun $7,1 ba MKI, nune’e hafoin halo ezersísiu internál atubele koloka tuir nesesidade ministériu no imlementasaun programa, nota katak presiza tan osan, nune’e tenke husu adisionál.
“Tanba ne’e, ami aprezenta proposta adisionál hodi finansia programa sira hanesan manutensaun merkadu, programa treina ba parke industriál, reabilitasaun projetu masin iha Atabae, feira nível nasionál no internasionál hodi promove produtu potensiál sira. Ne’ebé ami husu adisionál millaun $3,4 depois ekipa Komité Revizaun tetu, sira aseita ho millaun $1-resin, ne’ebé totál osan ba ministériu tinan 2024 nian sai millaun $8-resin,” Ministru Nino Pereira hateten ba jornalista sira hafoin ramata aprezentasaun, iha auditóriu, Ministériu Finansa, Aitarak-laran, kuarta ne’e.
Notísia relevante : MKI partilla politíka dezenvolvimentu ekónomiku ba setór privadu iha Covalima
Nia dehan, ministériu nafatin foku ba komérsiu hodi haree lejizlasaun balun hodi bele kumpre adezaun Timor-Leste ba Asosiasaun Nasaun Sudeste Aziátiku (ASEAN, sigla inglés) no Organizasaun Mundiál Komérsiu (OMK).
Aleinde ne’e, haree lisensamentu komersiál, halo estudu viabilidade, atividade feira nasionál no internasionál, inklui koloka sekretariadu iha integrasaun ekonómiku organizasaun iha ASEAN, OMK no nível Ázia Pasífiku.
Iha área indústria, ministériu kontinua programa parke industriál atu define estatutu rai, ne’ebé sei koordena ho Ministériu Justisa hodi haree ba kestaun rai liga ho konstrusaun projetu ne’e rasik.
Nune’e mós, finansia projetu reabilitasaun ba sentru produsaun masin iha Ulmera (Liquiçá), Atabae (Bobonaro), formasaun téniku, apoia dezenvolvimentu ba mikro no pequena empreza.
Jornalista : Antónia Gusmão
Editora : Julia Chatarina
