COVALIMA, 15 novembru 2023 (TATOLI) – Eleisaun lokál iha munisípiu Covalima, iha suku 24 mak avansa ba segunda volta ho nia kandidatura hamutuk 49 ne’ebé realiza iha loron 13 novembru. Husi totál suku ne’e, iha kandidatura feto ida mak reeleita ba xefe suku mak Maria Fátima hodi kontinua lidera suku Maudemo iha postu administrativu Tilomar.
“Bazeia ba Rezultadu eleisaun hatudu katak ita-nian xefe suku Mária Fátima husi suku Maudemo reeleita ba periódu 2023-2030 ho votu 817”, Diretór Sekretariadu Tékniku Administrasaun Eleitorál (STAE) Covalima, Francisco Gusmão, informa hafoin simu rezultadu eleisaun lokál ba segunda volta ne’e iha nia knaar fatin Kampung Baru, ohin.
Lembra katak iha Covalima, kandidatura xefe suku hamutuk 49 mak avansa ba segunda volta no husi totál ne’e iha feto na’in-tolu mak Mindarita Alfrida de Jesus husi suku Taroman, postu administrativu Fatululik no husi postu Tilomar mak Maria Fátima husi suku Maudemo no Domingas da Silva husi suku Baiseuk, maibé ida de’it mak eleita.
Tuir dadus husi STAE Covalima, xefe suku ne’ebé reeleitu iha eleisaun órgaun suku segunda volta husi postu administrativu Fatululik mak husi suku Taroman Leonel Asa no Fatululik mak Carlos Mendonça. Iha postu Fatumea, Óscar Ferreira Amarál eleitu ba xefe suku Belulik Leten, Sérgio do Rego ba suku Fatumea no Abel Mendonça ba suku Nanu. Iha postu Fohorem, Gaudêncio Perreira eleitu ba xefe suku Dato Rua no Julião Perreira Alves ba suku Fohorem.
Iha postu administrativu Maucatar, Leonito Gusmão reeleitu ba xefe suku Belekasak, Cipriano Gusmão ba suku Holpilat, Nuno José Pereira ba suku Matai no Febriano Perreira eleitu ba xefe suku Ogues.
Postu administrativu Tilomar, António Cardoso eleitu ba xefe suku Beiseuk, Octaviano Maia ba suku Casabauk, Zeferino Jesus Richman ba Lalawa no Mário Fátima reeleitu ba xefe suku Maudemo.
Ba postu administrativu Suai, Fernando Noronha eleitu ba xefe suku Camnasa, Arlindo Bernardino Lemos ba suku Beco, Paulo de Sena ba suku Labarai no Manuel Gomes da Costa ba suku Suai Loro. Iha postu Zumalai, Miguel Barreto eleitu ba xefe suku Fatuleto, Júlio Alves ba suku Lour, Agostinho Sequeira ba suku Raimea no Jacob Alves ba suku Tashilin.
Iha munisípiu Covalima, suku neen mak la tama iha eleisaun segunda volta tanba kandidatu sira eleitu kedan iha primeiru ronda ne’ebé realiza iha 28 fulan-novembru.
Suku neen ne’ebé la tuir eleisaun volta daruka mak Laktos no Dato Tolu iha postu administrativu Fohorem, Debos iha postu Suai, Mape, Usecai no Zulo iha postu Zumalai.
Notísia relevante:Autoridade Covalima husu xefe suku eleitu serbí komunidade ho fuan
Jornalista: Celestina Teles
Editora: Maria Auxiliadora
