SEFOPE atribui sertifikadu profisionál ba joven na’in-57

DILI, 22 novembru 2023 (TATOLI) – Sekretáriu Estadu Formasaun Profisionál no Empregu (SEFOPE), atribui sertifikadu profisionál ba formandu na’in-57, ne’ebé konklui ona  formasaun no estájiu iha área pedreira, administrasaun, finansa, turizmu no otelária.

“SEFOPE fó kapasitaun ne’e, atu aumenta sira nia konesimentu atubele buka serbisu iha area espesifiku ne’ebe sira. formadu hamutuk na’in-57”, hateten Diretór Jeral Servisu Kooperativa SEFOPE, Francisco Soares Cabral, iha Caicoli.

Diretór ne’e explika formandu sira ne’e tuir ona formasaun durante fulan-ne’en no iha konesimentu kona-ba área espesifiku sira hodi bele kompete iha merkadu traballu.

SEFOPE atribui sertifikadu apresiasaun ba entidade sira ne’ebé fornese serbisu ba joven sira ne’ebé hetan formasaun.

Iha fatin hanesan, Formanda iha pedreiru, Amelia Freitas Ximenes, hateten agaradese tebes tanba liuhosi formasaun ne’e bele hetan experiensia no abilidade iha konstrusaun.

“Ami tuir formasaun no estajiu hamutuk fulan neen nia laran. Ha’u hala’o ha’u nia estajiu iha kompanã Solo de Belu, ami halo konstrusaun lantai tolu iha ne’eba”, nia agardese.

Jornalista: Jesuína Xavier

Editór       :  Florencio Miranda Ximenes