COVALIMA, 30 novembru 2023 (TATOLI) – Ekipa monitorizaun ba Programa Merenda Eskolár identifika katak implementasaun merenda eskolár iha Eskola Bázika Sentrál (EBC )Ogues la tuir menu tanba fonesimentu hahán la saudavel.
Diretór Servisu Agrikultura Munisípiu Covalima, Reinaldo Coli, ne’ebé lidera ekipa haat hodi monitoriza programa refere hatete merenda ne’ebé alunu sira han hanesan modo no ai-fuan la fresku, tanba namlaik ona.
“Ami identifika iha EBC Ogues fó modo ho ai-fuan la fresku, tanba rai iha armazein entaun halo sira namlaik mak hodi tein fó estudante sira han”, Reinaldo Coli afirma iha salaun AMC, Sukaer-laran, ohin.
Nia dehan merenda eskolár ne’e tenke fornerse grupu ai-han ne’ebé maka fó forsa, hanesan batar, ai-farina, talas, kontas, paun, hudi, kulu, makaroni, fehuk-midar, fehuk-europa, kumbili, mina ka bokur no seluk tan. Grupu ai-han proteína hanesan na’an karau, manu, ikan, manu-tolun no susubeen. Husi legume mak fore-rai, fore-kile, fore-mungu, fore-talin/metan no grupu ai-han fó protesaun mak modo-tahan no ai-fuan
Dirijente ne’e salienta iha lista ai-han ne’ebé bandu atu fó ba estudante sira hanesan sosis maran, susubeen (enaak), delos, fruitamin, ale ale, kafé, masako, ajinomoto, supermie, biskuit, ikan lata, sosis no ai-fuan lata.
Entretantu iha lista ne’ebé bandu atu fó ai-han sira ne’e ba estudante sira, maibé bazeia ba monitorizasaun identifika katak iha produtu balun mak uza ba merenda alunu sira-nian.
“Tipu ai-han ne’ebé bandu hanesan masako ne’e iha Ekipa Jestaun Programa Ogues ami identifika iha tein fatin iha masako kulit. Ha’u husu sira tein ho masako ka la’e, maibé sira hateten la’e, estudante sira maka lori husi uma bá eskola”, relata.
Koordenadór Programa Merenda Eskolár, Francisco Cardoso, rekoñese katak estudante sira mak lori masako husi uma hodi han iha eskola.
Tuir dadus, alunu ne’ebé sai benefisiáriu ba Programa Merenda Eskolár iha Covalima hamutuk 17.416, husi eskola 135 – Eskola Bázika Sentrál 94 no Pré-eskolár 41.
Notísia relevante: AMC identifika implementasaun programa merenda eskolár la tuir menu
Jornalista:Celestina Teles
Editora: Maria Auxiliadora
