iklan

Uncategorized

CLN husu públiku hato’o keixa bainhira konsumu foos lokál laiha kualidade

CLN husu públiku hato’o keixa bainhira konsumu foos lokál laiha kualidade

Presidente CLN foun, Jervazio Cardoso Jesus da Silva. Imajen TATOLI/Egas Cristóvão

DILI, 01 dezembru 2023 (TATOLI) – Prezidente Sentru Lojístika Nasionál (CLN, sigla portuges), Jervazio Cardoso, husu ba konsumidór ne’ebé sosa foos lokál ho folin $12, bainhira konsumu sente laiha kualidade bele hato’o keixa mai iha Sentru Lojístika Nasionál (CLN) atu rezolve.

“Ha’u husu ba públiku atu aprezenta keixa kona-ba kualidade foos lokál ne’ebé CLN halo intervensaun merkadu ho kada saka25kg ho presu $12”, Prezidente CLN ne’e hatete ba Agência TATOLI, iha kna’ar fatin-Tibar.

Tuir nia, foos lokál ne’ebé CLN utuliza iha intervensaun merkadu iha kualidade ba konsumu, tanba CLN sosa haré kulit mak dulas hodi sai foos lokál ne’e.

“Ita tenki rekoñese ita nia foos tanba ida ne’e produtu lokál ita nian. Ami la kahur buat ida. Ami nia intervensaun iha merkadu foos rai hotu, la’ós foos importasaun. Foos sira ne’e dulas iha fulan rua liubá”, nia informa.

Diretór ne’e garante kualidade foos lokál ne’e tanba iha armazein CLN kontinua asegura no halo fomigasaun, molok halo intervensaun ba iha merkadu.

“Ami halo fomigasaun depois de dulas haré kulit sai foos ami halo fomigasaun atu hamate kutun. Liutiha semana rua ami bele halo intervensaun ba iha merkadu”, nia esplika

Tanba ne’e, nia rejeita públikasaun balun iha rede sosiál katak foos lokál laiha kualidade.

“Ita labele politiza kona-ba intervensaun Governu nian ba iha merkadu, se iha baze hetan problema ka buat ruma a’at, ami responsabiliza. Miabé tenke hato’o keixa mai iha CLN, hafoin CLN mak buka dalan atu bele rezolve”, nia afirma.

Daudaun ne’e, CLN hala’o intervesaun merkadu ho foos lokál iha Rejiaun Administrativa Oe-cusse Ambeno no sei konklui intervensaun iha Ataúro iha semana oin.

Notísia relevante: Governu hahú fa’an foos ho presu baratu iha Pante Makasar

Jornalista: Jesuína Xavier

Editór      : Florencio Miranda Ximenes

iklan
iklan

Leave a Reply

iklan
error: Content is protected !!