Governu hahú fa’an foos ho presu baratu iha Pante Makasar
OÉ-CUSSE, 30 novembru 2023 (TATOLI) – Governu liuhosi Sentru Lojístika Nasionál, (CLN, sigla portugés), kinta ne’e halo lansamentu hodi fa’an foos ho presu baratu iha suku Lifau, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
“Foos iha oin-rua maka iha-ne’e, ida marka CLN kilograma 35 ho presu $15.00, ida fali hosi kompañia sira-ne’ebé hatama mai iha CLN nia kilograma 25 ho nia presu $12.00, no totál foos ne’ebé CLN transporta hosi nasionál mai iha Oé-Cusse hamutuk saka 1.460,” Diretór Nasionál Transporte Lojítika CLN, Tito da Costa, ko’alia iha ámbitu lansamentu ne’e.
Nia informa, foos hirak-ne’e, sei fahe kada suku ida ba uma-kain 200, karik la kobre hotu suku sira iha territóriu Oé-Cusse, CLN sei fahe tán ba faze tuir mai.
“Tanba munisípiu sira hotu ami kuaze la’o hotu ona, tama dalarua to’o tolu, só Oé-Cusse maka CLN foin tama, ne’ebé ami sei mai fali iha faze tuir mai,” nia informa.
Notísia relevante: Foos ho kilograma 25 iha Nítibe: Antes $14,50, agora sa’e ba $20,50
Adjuntu Prezidente Autoridade RAEOA ba Asuntu Sosiál, Maximiano Neno, agradese tanba ho esforsa tomak bele transporta foos saka 1.460 mai to’o Oé-Cusse, maske distánsia dook, maibé tanba nesesidade presiza konsidera.
“Ha’u reprezenta Autoridade RAEOA, ami agradese ba Governu Sentrál no CLN ba esforsa tomak ne’ebé maka halo hodi halo intervensaun presu merkadu liuliu folin foos, nune’e bele hakmaan todan hosi ita-nia komunidade sira, tanba bele hola foos ho folin baratu, espera programa ne’e bele kontinua implementa iha futuru,” nia dehan.
Xefe suku Lifau, Delfino Sole, sente orgullu tanba Governu hili suku Lifau halo lansamentu intervensaun merkadu kona-bá folin foos
“Tanba durante ne’e ita observa foos kilograma 20 fa’an ho $16,50 kilograma 25 bele fa’an to’o $17,50, maibé ho intervensaun Governu, bele apoia tebes komunidade sira, ita mós agradese tanba ohin suku Lifau dahuluk simu intervensaun ne’e,” Autoridade lokál ne’e orgullu.
Notísia relevante: Governu presiza intervein folin foos iha Oé-Cusse, saka ida $20
Jornalista: Abílio Elo Nini
Editór: Evaristo Soares Martins
