MOP deteta bee-matan iha Casnafar nia leten bele fornese ba Dili laran
LIQUIÇA, 06 dezembru 2023 (TATOLI) – Ministru Obras Públika (MOP), Samuel Marçal, dehan tékniku sira deteta ona bee-matan ida iha Casnafar nia leten ho kualidade atu bele fornese no sirkula iha kapitál Dili.
“Antes ne’e, Governu halo hela estudu ida, maibé estudu ne’e halo iha fali sorin, maibé foin lalais ha’u orienta tékniku sira ba haree ida di’ak liu boot liu ne’e iha fali sorin, bainhira ita dada mai bele ajuda tebes Dili laran hodi redús problema bee-moos no hamenus ema atu fura bee arbiru”, Ministru MOP, hateten ba jornalista sira iha Liquiça, ohin.
Nia dehan, orientasaun la’o ona no sira tékniku hosi Bee Timor-Leste Empreza Púbkiku (BTL, EP) hahú halo dezeñu no estudu ida ne’ebé di’ak hodi dada ona bee ne’e mai Dili.
“Agora ha’u dudu hela tékniku sira atu halo estudu no dezeñu ida atu nune’e tinan oin ita bele hahú loke konkursu, se la’e 2025 ita bele komesa”, nia hatete.
Bainhira bee ne’e dada duni mai Dili hodi fornese ba komunidade hotumak Governu sei taka hotu bee ne’ebé komuniade sira fura iha Dili no taka mós ligasaun ilegál sira.
Kona-ba implementasaun ba bee ne’e, nia parte sei hasoru malu ho Embaxada Japaun iha Timor-Leste atu husu apoiu tékniku oinsa mak bele dada bee ne’e ba kapitál.
Jornalista: Hortencio Sanchez
Editór : Zezito Silva
