DILI, 11 dezembru 2023 (TATOLI) – Diretór Servisu Saúde Manatuto, Mateus Vicente Correia, dehan profisionál Saúde iha Manatutu fahe kímiku abate ba kada uma-kain sira atu halo prevensaun ba moras dengue.
“Ami-nia ekipa sira durante udan monu rai, sira prepara ona abate hodi fahe ba kada uma-kain sira atu prevene moras dengue iha Munisípiu Manatutu”, Mateus Vicente Correia informa ba TATOLI via telefone, ohin.
Nia hateten, profisionál saúde sira prepara kímiku ne’e tanba iha fulan novembru pasiente na’in rua afeta ba kazu dengue iha Postu Administrativu Natarbora no Munisípiu Manatutu.
“Pasiente na’in rua ne’e ho idade adultu, husi Postu Natarbora ne’ebé afeta ba kazu dengue iha fulan novembru nia laran, entaun ida-ne’e mak ami-nia ekipa tun halo sosializasaun hodi fahe informasaun sira kona-ba oinsá atu prevene dengue tanba ita haree katak tempu udan ne’e susuk aumenta barak banhira bee nalihun susuk moris ba no mós foer sira soe arbiru, ida-ne’e mak atu hamosu kazu dengue ne’e aumenta”, nia esplika.
Nia husu ba komunidade sira, nafatin halo limpeza jerál iha sira-nia bairo no aldeia atu nune’e prevene moras dengue ida-ne’e ba oin.
‘’Ha’u husu ba populasaun Manatutu katak nafatin mantein limpeza iha bairo no aldeia sira hodi prevene moras ida-ne’e”, nia haktuir.
Ai-moruk kímiku abate no malation, Servisu Saúde Manatutu sei sufisiente hela atu atende ba populasaun sira banhira hetan kazu dengue.
Jornalista : Felicidade Ximenes
Editór : Zezito Silva
