ACT relata rezultadu servisu ba PR Horta

DILI, 13 dezembru 2023 (TATOLI) – Asosiasaun Kafé Timor (ACT-sigla portugés) hasoru malu ho Prezidente Repúblika José Ramos Horta hodi relata servisu, relativu ho ezekusaun apoiu orsamentu retifikativu.

“Ami mai relata ba Prezidente Repúblika tanba ami hanesan mahon ba agrikultór sira iha munisípiu hitu ne’ebé mak ami nia membru sira iha, no ami halo ona pagamentu 40% ba tos-na’in sira no hela 60% mak ami seidauk halo ezekusaun, orsamentu sira ne’e hosi orsamentu retifikativu”, Prezidente ACT Evangelino Monteiro Soares, dehan ba jornalista sira iha Palásiu Prezidensiál, ohin.

Nia subliña, servisu ne’ebé ACT halo mak re-abilitasaun ba kafé tuir kontratu ne’ebé asina ona ho Ministériu Agrikultura no Peska (MAP) iha oitavu Governu.

Nia dehan, re-abilitasaun ba kafé kuaze selu ona 40% ba tos-na’in sira maibé hela 60% hein desizaun Governu nian, bainhira verifikadu hafoin halo pagamentu iha tempu besik.

Nia haktuir, Prezidente Repúblika sei tún direta ho ACT hodi observa servisu ne’ebé tos-na’in sira halo iha munusípiu. Servisu ne’e hanesan meiu ida atu hasai hotu kafé ne’ebé tuan ona no husik fali balun ne’ebé moris foun, atu bele fó fuan barak hodi hasa’e produsaun kafé iha Timor-Leste.

“Agora daudaun ita-nia produsaun kafé tun liu, ida-ne’e mak Governu kria programa ida-ne’e no Prezidente Repúbkika apoiu tebes”, nia dehan.

Munisípiu ne’ebé implementa ona programa ne’e mak Ermera, Liquiça, Bobonaro, Aileu, Ainaro, Manufahi no Manatutu. Ba programa ne’e oitavu Governu antes ne’e apoiu orsamentu hamutuk millaun $ 2,8.

Jornalista: Hortencio Sanchez

Editór : Zezito Silva