DILI, 15 dezembru 2023 (TATOLI)-Ministru Juventude, Desportu, Arte no Kultura (MJDAK), Nélio Isac Sarmento, kompromete kontinua hametin parseiru ho Asosiasaun Nasionál Múzika Timor-Leste (ALMAMOR) hodi proteje obra artista timoroan.
“Ha’u atu fó hanoin ba sira katak iha kongresu ida ne’e halo desizaun di’ak no fortifika imi nia revizaun ba Asosiasaun ho di’ak atu sai parseiru di’ak Governu nian iha futuru. Tanba iha programa lubuk ida ita atu dezenvolve iha arte no múzika.
Nune’e espera katak kongresu ne’e la’o di’ak hodi bele hamutuk ho SEAK hodi define programa prioridade sira atu proteje obra artista timoroan”, hateten Ministru ne’e iha ámbitu loron dahuluk kongresu ALMAMOR, iha salaun UCT, Balide-Dili.
Tanba ne’e, nia dehan Governu mai ho nia programa barak liu atu fó atensaun ba dezenvolve arte, múzika no kultura.
“Ita fortifika atu sai parseiru di’ak ba iha Governu hodi dezenvolve arte sira ne’ebé ba jerasun ida ne’e no jerasun futuru iha tanba joven kreativu iha área artista hahú barak ona,” nia afirma.
Daudaun, Governante ne’e nota timoroan maioria gosta rona múzika no kanta, maibé atu foti profisaun arte no múzika laiha rendimentu.
“Tanba merkadu múzika iha ita nia rai ne’e sei hetan difikuldade em termu rekursu umanu ajuda atu eleva artista sira nia obra. Tanba ne’e ALMAMOR iha rekursu atu eleva no proteje artista sira nia obra”, nia afirma.
Iha biban hanesan, Prezidente ALMAMOR, Henrique dos Santos, afirma sensibiliza dekretu Governu nian kona-bá Kodigu Direitu Autór no direitu konexu.
“Kongresu ida ne’e atu diskute programa prioridade sira, estatutu no sensibiliza kódigu Direitu Autor no Konexu. Loron primeiru ita foka ba lei kodigu Direitu Autor no direitu Konexu, Tanba ALMAMOR hamutuk ho Parlamentu no Prezidente no entidade hotu kona-ba aprovasaun ba lei ne’e”, nia hateten.
ALMAMOR hahú husi 2017 luta ba aprovasaun ba lei kodigu autór, tanba ne’e mak ALMAMOR orgullu ho Governu ida ne’e fó fiar hodi bele sensibiliza lei ida ne’e.
Jornalista: Jesuína Xavier
Editór : Florêncio Miranda Ximenes
