SMSB kontinua hein apoia orsamentu hodi reabilita edífisiu iha Baucau
BAUCAU, 15 dezembru 2023 (TATOLI) – Serbisu Munisipál Saúde Baucau kontinua hein apoia orsamentu hosi Ministériu Saúde inklui autoridade administrasaun munisipál hodi halo reabilitasaun ba edifísiu hafoin hetan inséndiu iha fulan-outubru liubá.
Diretór Serbisu Munisipál Saúde Baucau, Domingos Reinaldo Guterres, esplika, hafoin kazu inséndiu parte responsável halo ona relatóriu kona-ba uma inklui sasán sira-ne’ebé hetan estragu no halo proposta ba nasionál, liuliu Ministériu Saúde atubele buka solusaun ba edifísiu refere.
“Ita halo kedas relatóriu depois inséndiu ba Ministériu Saúde no Autoridade Munisipál Baucau tanba ne’e atu halo reabilitasaun depende ba lideransa tuir kompeténsia,” Diretór Serbisu Munisipál Saúde Baucau hateten iha Vila Antiga, sesta ne’e.
Domingos Guterres,argumenta, nafatin kontinua hein apoia orsamentu ba reabilitasaun edifísiu hosi autoridade munisípiu Baucau liuhosi Ministériu Admistrasaun Estatal no direita hosi Ministériu Saúde nune’e bele fasilita prosesu atendimentu saúde iha munisípiu Baucau.
Maske nune’e, Serbisu Saúde Baucau deside sei kontinua utiliza edifísiu refere tanba limitasaun fatin kompostu diresaun moras hadaet hanesan HIV SIDA, dengue malária, turbekolojia no laboratóriu, enkauntu diresaun seluk inklui administrasaun muda ona iha eis eskola infermeira Tirilolo.
“Fatin foin ne’e la difikulta maibé ambiente foun no fatin mak kloot nune’e limita movimentasaun,” Domingos Guterres akresenta.
Entertantu kazu inséndiu edifísiu Serbisu Munisipál Saúde Baucau akontese iha loron 03 fulan-outubru deskonfia serkuitu eletrisidade ne’ebé rezulta eis Ospitál Portugés ne’e hetan estragu hosi internál to’o kakuluk.
Jornalista : Natalino Belo
Editór : Evaristo Soares Martins
