Projetu edifísiu Edukasaun Baucau atinje pursentu 47
BAUCAU, 08 janeiru 2024 (TATOLI) – Progresu projeitu konstrusaun edifísiu Serbisu Munisipál Edukasaun Baucau atinji ona pursentu 47 iha 2023 liubá.
Diretór Serbisu Munisipál Edukasaun Baucau, Augosto Ornai Ximenes, esplika, rezultadu refere relata hosi kompañia konstrusaun liuhosi relatóriu serbisu bazea ba kontratu liuhosi orsamentu Programa Dezenvolvimentu Integradu Munisipál (PDIM) ne’ebé hala’o entre Autoridade Munisipál Baucau iha inísiu tinan-2023 nian.
“Tuir relatóriu kompañia relata mai atinje ona pursentu 47, hein katak bele termina tuir durasaun kontratu,” Diretór Serbisu Munisipál Edukasaun Baucau informa ba Agência TATOLI iha Vila nova, segunda ne’e.
Projeitu refere prepara hosi Edukasaun Baucau no hetan aprovasaun hosi Reuniaun Koordenasaun Konsultivu Munisipál no hetan alokasaun orsamentu liuhosi Orsamentu Jerál Estadu (OJE) tinan-2023 ne’ebé Autoridade Munisipál Baucau mak na’in ba projeitu refere.
Edifísiu refere ho medida 10x20m² no bainhira finaliza sei koloka seksaun inklui divizaun sira ho kedas fasilidade hanesan moru, moru haleu inklui ekipamentu sira.
Projetu konstrusaun edifísiu Serbisu Munisipál Edukasaun Baucau hahú selebra kontratu iha fulan-marsu, durasaun serbisu tinan-ida ho tótal orsamentu hamutuk $448.942,51, ne’ebé kompañia Caidara-lata mai sai manán-na’in.
Jornalista : Natalino Belo
Editór : Evaristo Soares Martins
