DILI, 09 janeiru 2024 (TATOLI) – Defeza arguidu Apolinario dos Santos Asunção, Defensór Públiku Marçãl Masquerinhas prepara ona rekursu hodi kontesta desizaun Tribunál Judisiál Primeira Instánsia Dili (TJPID) ne’ebé deside aplika pena prizaun efetivu tinan haat ba nia kliente Apolinario.
“Ita bo’ot sira hatene katak horseik desizaun Tribunál sai ona no kazu ne’e seidauk ba tranzitu en-juladu, sei iha hela faze rekursu. Enkuantu ha’u nia kliente Apolinario hetan pena efetivu tinan haat. Desizaun ida-ne’e ha’u hanesan parte defeza la aseita, tanba ne’e mak ha’u prepara ona rekursu hodi submete ba Tribunál Rekursu hodi kontesta desizaun ne’ebé Tribunál Judisiál Prmeira Instánsia aplika ba iha ha’u nia kliente”, Marçãl Masquerinhas, hateten ba TATOLI via telefone, tersa ne’e.
Nia esplika, hanesan parte Defeza la konkorda ho desizaun Tribunál, tanba arguidu Apolinario momentu ne’ebá hala’o servisu bazeia orden ministru nian hodi kontrola ba servisu ne’ebé Ministériu Komérsiu Indústria (MCI) halo momentu ne’ebá.
“Ha’u simu ona despaixu hosi Tribunál liuliu karta akordaun hosi Tribunál nian horseik, ha’u lé ona no ha’u la simu desizaun ne’e no ha’u prepara ona rekursu, ha’u sei submete iha tempu badak hodi rekore ba Tribunál Rekursu liga ho desizaun Tribunál Primeira Instánsia nian ne’ebé kondena ha’u nia kliente ba pena efetivu tinan haat”, Marçal afirma.
Iha sorin seluk, Defeza hosi António Conceição, Advogadu Privado, Pedro Camões, to’o agora seidauk halo rekursu hodi kontra desizaun Tribunál Primeira Instánsia Dili nian ne’ebé kondena nia kliente ho pena efetivu tinan lima.
“Depois horseik desizaun Tribunál aplika pena prizaun tinan lima ba ha’u nia kliente, to’o agora ha’u seidauk bele halo rekursu ruma ba desizaun ne’e, tanba ha’u seidauk simu karta akordaun hosi Tribunál liga ho desizaun Tribunál nian ba ha’u nia kliente”, nia dehan.
“Kuandu ha’u simu ona karta akordaun ne’e hosi Tribunál, ha’u lé no sei haree atu ha’u bele halo rekursu. Por enkuantu agora seidauk”, nia koklui.
Rekorda fali katak iha segunda (8/1) Juiz prosesu ne’ebé kaer kazu António Conceição ba projetu eskavasaun masin Atabae, Juiz Ivan Suritai, deside pena efetivu tinan lima ba arguidu antigun Ministru MCI António Conceição ba krime partisipasaun ekonómia no negósiu tanba durante julgamentu faktu sira provadu katak arguidu komete duni krimé ne’ebé Ministériu Públiku imputa iha nia akuzasaun.
Arguidu Apolinario dos Santos Tribunál kondena pena efetivu tinan haat ba krime partisipasaun ekonómia no negósiu tanba durante julgamentu faktu sira provadu katak arguidu komete duni krime ne’ebé Ministériu Públiku imputa iha nia akuzasaun.
Arguidu Domingos Goveia nu’udar nain ba Empreza Hugo Amor Unipessoál Lda ne’ebé hetan fiar hosi Ministru Komérsiu Indústria ba projetu eskavasaun masin fatuk iha Atabae, Tribunál deside hodi absolve arguidu hosi krime administrasaun danoza no aplika pena indeminizasaun ho valór osan $17.000. Tanba konsidera arguidu nia hahalok ne’e hamozu prezuiju ba Estadu ho valór kuantia $17.000.
Notísia relevante : Tribunál aplika pena efetivu tinan lima ba António da Conceição
Jornalista: Natalino Costa
Editór : Zezito Silva
