Pozisaun Sali-Magu ba akizisaun medikamentu
DILI, 18 janeiru 2024 (TATOLI) – Empreza Sali-Magu Unipessoal Lda to’o agora seidauk importa ai-moruk mai Timor-Leste tanba akizisaun ba medikamentu sei iha prosesu nia-laran.
“Kona-ba ai-moruk nian, prosesu ami halo ona, prosesu mak ami hameno ona ba fábrika no halo ona produsaun, la’os de’it iha Indonézia maibé iha fatin barak hanesan iha Austrália, Banlades no iha nasaun sira seluk, depende ba empreza nia kapasidade ba ko’alia ho fábrika sira, halo negosiasaun, entre ami ho fábrika, tanba ne’e iha justisa ema bolu dehan segredu justisa, iha negósiu mós ema bolu dehan segredu negoóiu”, Diretór Empreza Sali-Magu Unipessoal Lda, Sansão Gomes dehan ba jornalista sira bainhira hala’o konferénsia imprensa iha CCI-TL, ohin.
Gomes akresenta, empreza halo ona kontratu ho nasaun Indonézia, nia notifikasaun aprezenta ona ba Ministériu Saúde no Institutu Nasional Farmasia no Produtu Médiku (INFPM).
“Finál fulan-ne’e, ita espera katak iha tasi laran anin lalika bo’ot, tasi lalika boot atu ai-moruk to’o iha ne’e, depois dokumentu hotu ita trata iha alfándega atu nune’e kontentór sira tula ai-moruk ne’e mai, bele lori ba INFPM hodi bele halo deskaregamentu iha ne’eba, hodi bele responde ba nesesidade fasilidade saúde ne’ebé menus estoke ai-moruk”, nia afirma.
Na’in ba empreza afirma, Komisáriu Alfándega fó sai katak empreza la rejista iha sistema asycuda, ida-ne’e los, tanba empreza rasik seidauk importa ai-moruk mai TL.
“Ami seidauk hatama ai-moruk mai, oinsá mak ami iha lista alfándega, bainhira ai-moruk tama mai, ida ne’ebe mak iha responsabilidade iha odamatan mak alfándega, empreza tenke aprezenta nia dokumentu ba alfándega atu sira prosesa sasan tama hodi bele aplika ba taxa”, nia subliña.
Notísia relevante: Ai-moruk item rua mai ona no sei hatama tan kontentór haat
Nia esklarese, bainhira ai-moruk mai ona mak automatikamente dadus iha alfándega iha ona, maibé agora sasan seidauk to’o mai mai TL sginfika lista seidauk iha.
Nune’e mós, produtu konsumavel kontentór haat ne’ebé hatama iha armajen INFPM, iha dezembru 2023, sosa husi klínika pridavu sira iha rai-laran, la’os iha rai-liur.
Notísia relevante : MS: Ai-moruk to’o ona iha INFPM tula ho kamioneta haat
“Produtu kosumavel ne’ebé ami hatama iha INFPM hamutuk 49 item ne’e signifika produtu ne’e iha kontentór haat, la’os kamioneta haat, ami hatama ne’e iha fulan dezembru 2023, ne’ebe hetan asinatura husi ekipa verifikasaun Ministériu Saúde nian. Portantu ida-ne’e mak empreza kumpre tiha ona nia obrigasaun kontratuál, kontentór haat ne’e, bolu produtu konsumavel, la’os produtu ai-moruk, konsumavel ne’e mak hanesan, algudaun, ligadura, luvas, entaun ida-ne’e la’os aimoruk”, nia esplika.
Gomes rekorda, empreza bainhira simu notifikasaun husi tribunál kontas katak fó ona vistu previu ba empreza nia kontratu, empreza halo kedas kontatu ba fábrika iha fatfatin, tanba empreza nia kontratu ne’e la’os sosa de’it item ai-moruk, maibé sosa mós produtu sira seluk.
Notísia relevante : MS: Ai-moruk menus tanba sei hein vistu préviu hosi ‘’Tribunal de Contas’’
Iha fatin hanesan, Vise Prezidente Kámara Komérsiu Indústria Timor-Leste (CCI-TL), Asuntu Jurídiku, Julio Fernandes, reforsa produtu konsumavel hamutuk kontentór haat, empreza sosa iha klínika privada balun iha Timor-Leste.
“Sasan sira ne’ebé maka iha loron 14 fulan dezembru, tinan 2023 ne’ebé fornese ba iha INFPM ne’e, empreza sosa iha rai-laran, kontentór haat, la’os komioneta haat, maibé kareta kompañia maka tula ba INFPM”, Julio Fernandes esplika.
Notísia relevante : tatoli.tl/…/ms-ai-moruk-too-ona-iha-infpm-tula-ho-kamioneta-haat
Nia haktuir, kona-ba produtu konsumavél, empreza sosa iha farmasia privada sira iha rai laran, nia responde katak ne’e segredu, se bainhira empreza refere sosa produtu la tuir espesifikasaun ne’ebé iha mak bele kestiona.
“Hanesan ne’e, iha buat ida asuntu negósiu, ne’e buat balun segredu, ou karik empreza hatama sasan ba nain ba projetu, mak la tuir espesifikasaun ne’e imi bele kestiona, ida-ne’e tanba buat ida negósiu ne’e buat balun segredu”, nia salienta.
Fernandes informa, Empreza Sali-Magu asina kontratu ho Governu iha loron 18 fulan outubru 2023. Ho orsamentu retifikativu millaun $6 maibé tenke hetan vistu previu husi tribunál kontas.
Notísia relevante : ms-ajudika-direta-empreza-sali-magu-sosa-medikamentu
“Iha 26 novembru 2023, foin tribunál fó katak projetu refere bele ezekuta ona, nune’e iha 26 mai leten empreza ezukuta ninia servisu bazeia ba kontratu ne’ebé mak iha, mak tribunal kontas fó notifikasaun ba Ministériu Saúde”, Fernandes informa.
Antes ne’e, Ministra Saúde Élia dos Reis Amaral, informa ai-moruk kamioneta ha’at ne’ebé Empreza Sali-Magu hatama, sosa iha nasaun oinoin hanesan Indonézia, Srilanka, India, Malaysia no mós Austrália.
INFPM deklara Sali-Magu sei hatama ai-moruk item 88 iha janeiru
Pasiente husu MS rezolve ai-moruk no Ministra Elia hatan
Komisaun F halo fiskalizasaun urjente ba INFPM haree problema aimoruk “stock out”
Jornalista : Felicidade Ximenes
Editór : Zezito Silva
