BOBONARO, 19 janeiru 2024 (TATOLI) – Funsionariu kontratadu Korpu Guarda Floresta na’in-18 iha munisípiu Bobonaro, kontinua servisu ho voluntáriu hodi hein desizaun hosi Ministériu Agrikultura, Pekuária, Peska no Floresta atu extende sira-nia kontratu ka lae.
Xefe Departamentu Reprezentasaun Territoriál, Floresta no Planta Indústria, Munisípiu Bobonaro, Martinho Bilimau, informa, guarda hirak-ne’e kontratu termina iha 31 dezembru 2023 bazea ba sirkulár hosi nasionál, maibé hanesan funsionariu, sira kontinua iha vontade atu halo servisu tanba seidauk iha desizaun atu hapara.
Notísia relevante: CGF ho PNTL Bobonaro sei halo operasaun iha aréa protezida
“Agora sira sei servisu nafatin, tanba laiha informasaun dehan sira atu para, tanba seidauk iha baze legál ida ka karta ida mai, atu ami bele dehan sira labele servisu ona, sé imi servisu sé mak atu selu imi, maibé to’o agora karta seidauk mai, agora guarda sira maioria sei servisu nafatin,” nia informa ba jornalista sira iha Maliana, sesta ne’e.
Foin lalais ne’e Responsávél Floresta Munisípiu Bobonaro halo ona avaliasaun ba prestasaun servisu gurada hirak-ne’e no daudaun ne’e submete ona ba nasionál atu foti desizaun.
“Sira agora seidauk iha kontratu, tanba sei prosesu sira-nia avaliasaun hotu, sira-ne’e tuir informasaun sei extende kontratu, maibé sira sei tuir konkursu públiku, sé kunkursu la liu pasiénsia, tanba ema barak ezije tenke liuhosi Komisaun Funsaun Públika,” nia dehan.
Tanba seidauk iha desizaun hapara kontratu ka lae, Xefe Departamentu ne’e, afirma, daudaun ne’e nia parte kontinua orienta guarda hirak-ne’e ativu servisu iha terrenu, liuliu halo patrullamentu no vijilánsia ba komunidade sira-ne’ebé tesi-ai, sunu ai arbiru no kontrola área protejida sira eziste iha munisípiu Bobonaro.
“Hau hanoin se sira rasik mak abandona ne’e urusan sira-nia, katak sira rasik mak hakotu sira-nia servisu atu la’o ba oin, tanba ba oin sei iha konkursu eletróniku fulan-neen mai oin,” nia dehan.
Enkuantu tuir dadus Gurda Floresta Munisípiu Bobonaro komposta hosi funsionariu permanente no kontratadu hamutuk na’in-25, maibé númere ne’e seidauk sufisiente atu halo kontrolu no asegura rekursu naturál sira-ne’ebé eziste iha postu administrativu neen.
Notísia relevante: Guarda floresta Bobonaro sei halo apreensaun ba kilat-manu
Jornalista: Sérgio da Cruz
Editór: Evaristo Soares Martins
