iklan

EDUKASAUN, BAUCAU, HEADLINE, MUNISÍPIU

Diretór Edukasaun Baucau sei hadi’a serbisu administrasaun

Diretór Edukasaun Baucau sei hadi’a serbisu administrasaun

Diretór Serbisu Munisipál Edukasaun Baucau foun kaer liman ho diretór sesante liuhosi serimonia termu entrega iha Vila Nova, kinta (25/01).

BAUCAU, 25 janeiru 2024 (TATOLI) – Diretór Serbisu Munisipál Edukasaun Baucau planeia foka hadi’a serbisu administrasaun liuliu atendimentu iha kada ensinu eskola hotu iha munisípiu Baucau.

Diretor Serbisu Munisipál Edukasaun Baucau foun, Afonso dos Santos da Costa, esplika, hafoin asume kna’ar nu’udar dirijente promete atu halo planu serbisu hamutuk ho estrutura hotu nune’e bele hadi’a sistema administrasaun inklui kapasita rekursu umanu nune’e dezenvolve setór edukasaun iha munisípiu Baucau.

“Ha’u-nia planu prioridade mak atu hadi’a administrasaun iha edifísiu atu atende diretiva eskola sira iha baze no hadi’a mós rekursu umanus atu apoia dezenvolve edukasaun ne’e,” Diretór Serbisu Munisipál Edukasaun Baucau hateten iha Vila Nova, kinta ne’e.

Durante asume kargu nu’udar dirijente edukasaun Baucau sei kompleta planu no programa ne’ebé durante mandatu diretor sesante halo ona no kontinua husu apoiu hosi diretór eskola sira no diretór sesante nune’e hamutuk dezenvolve setór edukasaun.

“Ha’u husu atu ita kontinua serbisu hamutuk oinsá dezenvolve edukasaun iha Baucau, tanba atu la’o di’ak apoiu hosi ita-nia diretiva sira nune’e hasa’e kualidade ne’ebé di’ak ba ita-nia oan sira liuliu ba futuru rai no nasaun ida-ne’e,” nia katak.

Diretor Serbisu Munisipál Edukasaun Baucau sesante, Augusto Ornai Ximenes, kompromete no prontu apoiu diretór foun iha kualkér programa ligadu edukasaun nian tanba área edukasaun setór importante ne’ebé presiza kontribuisaun husi ema hotu.

“Ita mai tanba konfiansa polítika maibé halo serbisu ba edukasaun labele dada bandeira polítika,” Augosto Ximenes hateten.

Totál funsionáriu iha Serbisu Munisipál Edukasaun Baucau hamutuk na’in-44 ne’ebé hala’o kna’ar iha kada departamentu no seksaun no balun destaka iha kada eskola.

Jornalista   : Natalino Belo 

Editór         : Evaristo Soares Martins

iklan
iklan

Leave a Reply

iklan
error: Content is protected !!