DILI, 26 janeiru 2024 (TATOLI) – Konstrusaun edifísiu foun Kuartél Jerál Polísia Nasionál Timor-Leste (PNTL) ho andar lima iha Caicoli sei hahú, entre fevereiru ka marsu tinan ne’e, tanba Ministériu Interiór (MI) hetan ona empreza konstrutora foun ne’ebé aprova ona husi Komisaun Nasionál Aprovizionamentu (CNA, sigla portugés).
“Ami garante katak fevereiru ka marsu ne’e prosesu kontrusaun ba Kuartél Jerál PNTL ne’e bele hahú ona tanba ami hetan empreza foun ida ne’ebé ninia prosesu hotu hetan ona aprovasaun husi CNA. Hein de’it kuandu hahú ona kontratu bele realiza ona obra ne’e”, Ministru Interiór, Francisco da Costa Guterres, hatete iha Caicoli, ohin.
Ministru Francisco haktuir katak iha konsultora independente foun ida maka antes ne’e hetan fiar hodi finaliza ona estudu ba rai iha Caicoli no dezeñu sira.
“Prosesu konstrusaun edifísiu foun Kuartél Jerál PNTL ne’e paradu tiha kuaze tinan sia. Agora, proseu bá oin maka inistériu sei halo aprosimasaun ho komunidade sira iha suku Caicoli atu bele apoia esforsu ne’ebé maka Ministériu Interiór prepara ona ba futuru Kuartél Jerál PNTL”, governante ne’e relembra.
MI sei lahasai arbiru família ne’ebé hela iha fatin konstrusaun edifísiu, maibé sei fó uluk indemnizasaun, tanba sira hotu konkorda ona antes sai tenke iha kompensasaun.
Ministru realsa katak agora aprosimasun ho komunidade ne’e maka importante tebes atu aselera, liuliu kona-ba indemnizasaun sira, tanba seidauk define atu apoiu kada uma-kain ho osan hira.
“Sé ita bá duni de’it sira, atu bá hela iha ne’ebé? Tanba ne’e, kuandu ita kompensa ona sira depois sira bá buka fatin foun hodi hela maka ita foin bele hahú konstrusaun ne’e”, garante.
Tuir governante, orsamentu ba konstrusaun edifísiu ne’e seidauk bele fó sai ba públiku bainhira prosesu hotu seidauk hetan aseitasaun husi CNA.
Iha sorin seluk, abitante Caicoli Rogério Marçal seidauk hetan informasaun katak Governu atu hahú fali konstrusaun ba edifísiu Kuartél Jerál PNTL.
Nia afirma katak bainhira Ministériu Interiór hakarak kontinua halo konstrusaun iha fatin ne’ebé família lima hela tenke ko’alia fali prosesu foun, tanba akordu anteriór ne’ebé halo ona konsidera inválidu. Tanba rai ne’ebé sira hela ne’e hetan ona desizaun husi Tribunál katak sira iha direitu atu hela no fó ona sertifikadu iha 2010 ba uma-kain sia iha Caicoli.
“Ami konkorda ho planu Governu nian atu halo konstrusaun iha rai ne’ebé ami hela. Atu ko’alia kona-ba indemnizasaun laloos ami mak atu deside, maibé Governu mak deside. Ninia prosesu tenke hahú foun filaflai tanba ida uluk ne’e ami la konsidera ona, tanba ami hetan ona desizaun husi Tribunál katak ami iha direitu ba rai refere”, salienta.
Rekorde katak Governu aprova, iha fevereiru 2022, projetu deliberasaun ida relasiona ho alterasaun kontratu ba konstrusaun foun Kuartél Jerál PNTL.
Kontratu ba konstrusaun ne’e asina ona iha 26 janeiru 2018, entre Estadu Timor-Leste ho Shanghai Construction Group Co., Ltd, maibé hafoin inísiu ezekusaun kontratu, haree katak projetu ne’e falla no bele afeta seguransa ba konstrusaun. Estudu ne’ebé hala’o ona konklui katak iha nesidade atu halo alterasaun ba projetu atubele reforsa fundasaun.
Antes ne’e, projetu konstrusaun edifísiu PNT lansa fatuk dahuluk iha 10 janeiru 2020, ne’ebé implementa husi empreza internasionál Shanghai Construction Group Co, Ltd (SCG) no konsultór PT. Ciriajasa Cipta Mandiri in JV With JKC Consultan Engineering Unipesoal Lda, ho valór orsamentu $10.177.638,20.
Iha 09 fevereiru 2021, uma-kain 11 iha aldeia 01 Sentru ba Unidade, suku Caicoli, munisípiu Dili no Organizasaun Rede ba Rai (RbR) husu ba Governu liuhosi Diresaun Nasionál Terras no Propriedade no PNTL, atu deside didi’ak valór indemnizasaun ba vítima sira ho justu no transparánsia ba públiku.
Jornalista: Tomé Amado
Editora: Maria Auxiliadora
