Autoridade Munisipál konsidera Baucau poténsia ba investimentu
BAUCAU, 30 janeiru 2024 (TATOLI) – Prezidente Autoridade Munisipál (PAM) Baucau konsidera munisípiu Baucau iha poténsia nune’e investidór barak hakarak investe liuliu iha setór ekonomia.
Prezidente Autoridade Munisipál (PAM) Baucau, Veneranda Eurico Marques Lemos Martins, esplika, hafoin simu pose, autoridade hetan ona kontaktu hosi investidór sira-ne’ebé iha interese hakarak investe iha Baucau ligadu ho setór ekonomia hanesan agrikultura, turizmu no edukasaun.
“Ami serbisu foin semana-ida maibé iha ona kontaktu investidór hosi rai-li’ur,” Prezidente Autoridade Munisipál Baucau hateten iha Vila Nova, tersa ne’e.
Eis Deputada ne’e argumenta, antes ne’e iha ona planu investementu maibÉ seidauk bele hahú no investImentu balun apreZenta hosi Konsellu Munisipál Kombatente Libertasaun Nasionál (CMCLN, sigla portugés) Baucau.
Maske nune’e presiza iha estabilidade no seguransa nune’e prosesu investimentu bele aselera no sei lori dezenvolvimentu inklui redus dezempregu iha munisípiu Baucau.
“Ita hotu-hotu iha responsabilidade atu dezenvolve rai Baucau,” Veneranda Lemos akresenta.
Autoridade Baucau sei konsentra uluk ba planu programa hosi IX Governu Konstitusionál kona-ba implementasaun lei podér lokál no desentralizasaun administrativa nune’e autoridade iha kompeténsia legál hodi deside kona-ba investementu iha munisípiu Baucau.
Governu planeia atu produs sumentu iha munisípiu Baucau área suku Tirilolo, postu Baucau Vila maibé to’o agora sedauk iha serteza kona-bá investimentu refere.
Alende ne’e, CMCLN Baucau rasik aprezenta ona planu investementu ba setór turismu, agrikultura no edukasaun maihosi investidór Brunei Darusalam ne’ebé sei hala’o iha área Cairavela, postu Vemasse, Uatabo no Vila Nova, suku Bahu.
Jornalista : Natalino Belo
Editór : Evaristo Soares Martins
