DILI, 31 janeiru 2024 (TATOLI) – Xefe Planeamentu husi Ministériu Transporte no Komunikasaun (MTK), Marçal Pinto, dehan ministériu ne’e fó prioridade ba tinan ida-ne’e mak kria sonoro (lian) ba ema ho difisiensia iha Dili, reabilitasaun terminál Bekora, instala semáforu ne’ebé modernizadu no dijitalidu no reabilitasaun halte.
MTK tau osan ba projetu instalasaun Sonora ba ema ho defisiénsia iha Dili ho orsamentu $125.225.
MTK orsamenta ba projetu reabilitasaun terminal Bekora ho montante $150.000.00
MTK koloka ho montante osan hamutuk $140,000,00 ba reabilitasaun halte hamutuk 16 iha Dili.
MTK prevé orsamentu ho totál $800.000.00 hodi instala semáforu ne’ebé modernizadu no dijitalidu.
Pinto esplika, instalasaun Sonora sei koloka iha fatin lima mak Ministériu Solidaridade Sosiál no Inkluzaun (MSSI), Palásiu Governu oin, Polísia Militár (Iha Maskarinhas) nian, Sentru Reabilitasaun no Ahisaun Comoro tanba fatin refere ema ho defisiénsia sira halo movimentasaun makas. Enkuantu semáforu sei instala iha fatin tolu ne’ebé dijitalizadu no modernizadu, fatin hirak ne’e maki ha Aitarak-laran, Lider oin no Colmera.
“Razaun ami harii lian sonoro ne’e katak fatin ne’ebé mak ita-nia maluk ema defisiénsia sira halo movimentu makas, presizamente ita tau sinál atu nune’e sira atraveza husi dalan sorin ba sorin ita buti lian, atu transporte públiku sira para hafoin sira hakat tiha mak kareta sira bele liu”, Marçal Pinto informa bainhira partisipa iha workshop iha Hotel Vila Verde, ohin.
Jornalista : Felicidade Ximenes
Editór : Zezito Silva
