OÉ-CUSSE, 19 fevereiru 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretária Rejionál ba Asuntu Finansa, Elvira de Carvalho Manat, fó sai, iha tempu badak sei loke konkursu públiku atu rekruta funsionáriu foun hamutuk na’in-44 hodi haforsa servisu finansa iha Oé-Cusse.
Notísia relevante:CFP observa Servisu Saúde Oé-Cusse laiha problema kona-bá rekursu umanu
Elvira de Carvalho Manat, informa planu ne’e, iha ámbitu enkontru kortejia ho ekipa Komisaun Funsaun Públika (KFP), lidera hosi Prezidente KFP, Agostinho Letêncio de Deus, iha salaun Finansa Oebau, Pante Makassar, foin lalais ne’e.
“Objetivu enkontru ne’e Komisaun Funsaun Públika, hakarak hatene rekursu umanu iha RAEOA liuliu Sekretária Rejional Finansa nian, tanba KFP konsidera kargu finansa todan maka presiza rekursu,” refere iha nota imprensa ne’ebé Agência Tatoli asesu, segunda ne’e.
Nota imprensa ne’e hatutan, iha biban ne’e, Sekretária Rejionál Asuntu Finansa, Elvira de Carvalho Manat, hato’o benvindu no agradese tanba KFP hakarak ajuda servisu iha RAEOA hodi la’o ho di’ak.
“Agora daudaun ami hasoru duni problema rekursu umanu liuliu iha Sekretária Rejionál Finansa nian, tanba funsionáriu permanente na’in-14 de’it, maibé Sekretária Rejionál Finansa haree ona planu ba 2024 sei rekruta tán funsionáriu hamutuk na’in-44.” Nota imprensa ne’e hateten.
Relasiona ho rekursu ne’ebé menus, Sekretária Rejionál Asuntu Finansa, agrdaese ba Governu Sentrál liuhosi Ministériu Finansa tanba daudaun ne’e ekipa téknika fasilita apoia servisu finansa iha RAEOA nian.
Notísia relevante:KFP hahú buka hatene problema profesór kontratadu sira iha Oé-Cusse
Prezidente Komisaun Funsaun Públika, Agostinho Letêncio de Deus, informa, prezensa Komisaun Funsaun Públika iha Oé-Cusse tanba orietasaun Primeiru Ministru, atu haree situsaun iha Oé-Cusse
“Ami iha mandatu ida mai hosi Primeiru Ministru husu ba ami, pontu ida mak atu haree situasaun jerál liga ho rekursu umanu, pontu ida tan mak kontinua ajuda RAEOA ba estabelesementu rekursu umanu tuir funsaun públiku nian,” nia katak.
Tanba ne’e maka iha antes, ekipa Komisaun Funsaun Públika, hala’o enkontru dahuluk ho Prezidente Autoridade RAEOA no Sekretária Rejionál sira-hotu, no enkontru ikusliu mak Sekretáriu Rejionál Finansa.
“Komisaun Funsaun Públika prontu atu rezolve problema rekursu umanu iha RAEOA liu-liu Sekretária Rejionál finansa nian,” nia promete.
Notísia relevante:PM Xanana husu Atoni-oan hamutuk ho Autoridade foun dezenvolve ekonomia sosiál iha Oé-Cusse
Jornalista: Abílio Elo Nini
Editór: Evaristo Soares Martins
