DILI, 22 fevereiru 2024 (TATOLI) – Nain ba empreza Natar-Rohan Maliana, Kiera Zen, hatete, iha ona investór rua hosi Austrália no Singapura hakarak servisu hamutuk hodi dezenvolve setór agrikultura.
“Ami mai hasoru malu ho Prezidente Repúblika atu ko’alia kona-bá investór rua hosi Austrália no Singapura mak hakarak atu servisu hamutuk ho ami. maibé ami sei duvida entaun husu ajuda nain Prezidente atu bá rai li’ur hodi buka tuir tanba Prezidente koñese di’ak investór internasionál sira,” Kiera hatete ba jornalista sira iha Palásiu Presidensiál-Bairru Pité.
Husu mós ba Prezidente Repúblika atu koordena ho parte Governu no kompañia boot balun atu parseria ho Natar-Rohan atu halo investimentu iha área agrikultura no agro-turizmu karik investór internasionál rua konsege servisu hamutuk ho Natar-Rohan.
“Investór rua ne’e fulan oin sei mai atu hasoru malu ho Prezidente Repúblika atu ko’alia kona-ba sira nia hakarak atu mai servusu hamutuk ho ami ne’e,” nia katak.
Kooperasaun ne’ebé investór internasionál rua ne’e hakarak halo ho Natar-Rohan mak dezenvolve barajen boot atu bele fornese bee ba agrikultór sira iha área Tunu-Bibi.
Atividade ne’ebé mak daudaun ne’e Natar-Rohan halo iha Maliana,Munisípiu Bobonaro mak agrikultura no agro-turizmu.
“Área agrikultura ami halo servisu integradu hanesan, halo natar, hakiak animál hanesan manu, ikan, kuda modo, kuda ai-fuan. Iha agro-turizmu halo uma du’ut ne’ebé turista sira bele ba deskansa tantu lokál no internasionál,” nia relata.
Dadaun ne’e, empreza Natar-Rohan akomula traballadór hamutuk 15 no iha mós joven voluntáriu balun ne’ebé hakarak atu ba apriende kona-ba servisu agrikultura no turizmu. Maibé ba oin empreza hanoin atu aumenta tan traballadór to’o 50.
Jornalista: Hortencio Sanchez
Editór : Florencio Miranda Ximenes
