UNP iha suku Defauasi sei kontinua hikas iha marsu
BAUCAU, 23 febereiru 2024 (TATOLI) – Projetu Uma Naroman ba Povu (UNP) faze daruak iha suku Defauasi, postu admistrativu Baguia tuir planu sei kontinua hikas iha fulan-marsu.
Xefi suku Defauasi, Salustiano Ximenes Guterres, esplika, projetu refere konsidera tarde tanba mudansa polítika, estrutura governasaun no realizasaun eleisaun suku maibé atuál iha faze preparasaun atu kontinua iha fulan-marsu mai.
“Ami hala’o ona enkontru iha suku atu halo preparasaun atu kontinua hikas UNP iha ami-nia suku,” Xefie suku Defauasi hateten iha Vila Antiga, sesta ne’e.
Aldende ne’e, fatór tékniku hanesan kontratu badaen ne’ebé tuir akordu presiza finaliza pagamentu pursentu 25 nune’e kontinua hikas projetu refere.
Uma hirak-ne’e atinje ona prusentu 60 no pursentu 40 mak seidauk finaliza hanesan aumenta sinta jerál, hada batako hodi taka kalen inklui monta odamatan no janela.
“Ekipa PNDS sei prepara dokumentu atu halo levantamentu orsamentu hodi kontinua uma sia ne’e,” Salustiano Guterres akresenta.
Suku Defauasi implementa projetu UNP hamutuk 16 iha faze daruak ne’ebé foin atinje pursentu 40 ho totál pagamentu pursentu 75 hosi totál orsamentu hamutuk hotu rihun $153.
Suku Defauasi hamutuk aldeia haat kompostu aldeia Saemeta, Laribere, Defauasi no Uarou ho totál populasaun 1.125 hosi uma-kain 225.
Jornalista : Natalino Belo
Editór : Evaristo Soares Martins
