OÉ-CUSSE, 26 fevereiru 2024 (TATOLI) – Ekipa Grupu Traballu bá Reforma Justisa liderada Lúcia Maria Brandão Freitas Lobato, segunda ne’e hala’o audiénsia ho autoridade judisiáriu sira iha Rejiaun Administrativa Espesiál Oé-Cusse Ambeno (RAEOA).
Objetivu hosi vizita ne’e rekolla preokupasaun hosi Autoridade Judisiáriu Oé-Cusse kona-ba setór justisa rejionál nian hodi aprezenta relatóriu ba Primeiru Ministru, Kay Rala Xanana Gusmão.
Notísia relevante: Xefe Estadu husu Grupu Traballu halais servisu ba reforma justisa
Ekipa ne’e komposta hosi Eis Prezidente Tribunál Rekursu, Claudio Ximenes, pesoál espesiál hosi UNDP, profesór hosi akadémiku no advogadu privada, hasoru hasoru malu ho Defensoria Públiku, Ministériu Públiku no Tribunál Distritál Oé-Cusse.
“Ohin ami rekolla informasaun barak tebes, bele ajuda ekipa ne’e atu prepara relatóriu hodi hato’o rekomendasaun konkreta ba Governu liuhosi Primeiru Ministru atu hadi’a ita-nia setór justisa,” Koordenadora Grupu Traballu bá Reforma Justisa, ko’alia iha Oé-Cusse.
Eis Ministra Justisa ne’e, realsa, durante vizita ofisiál ba autoridade judisiáriu sira iha Oé-Cusse, deteta problema tolu, liuliu infraestrutura, rekursu umanu, ho lei sira, nune’e problema hirak-ne’e, ekipa sei prepara relatóriu hodi enkamiña ba Primeiru Ministru.
“Iha marsu atu remata to’o abríl 2024 relatóriu ne’e publiku bele asesu ona, agora ami tempu servisu, ne’ebé ohin ami kontente mai iha Oé-Cusse, rona preokupasaun ita-nia autoridade judisiáriu sira, diskusaun barak ho triste, ha’u sente Estadu tenki tau matan no rona preokupasaun sira-ne’e atu oinsá bele rezolve problema sira-ne’e hosi kraik,” nia katak.
Nune’e administrasaun justisa bele la’o ho di’ak, povu bele haksolok no tribunál sira bele iha kredibilidade ba servisu sira-ne’ebé sira halo, atu hametin ita-nia Estadu Diretu Demokrátiku ne’ebé ema hotu iha lei hanesan, tribunál imparsiál, transparánsia no no povu nia di’ak.
Notísia relevante: Ekipa traballu reforma justisa hahú ona halo servisu
Juis Administradór Tribunál Distritál Oé-Cusse, Argentino Nunes, konsidera vizita ofisiál hosi Grupu Traballu ba Reforma Justisa, importante, atu observa direita kondisaun autoridade judisiáriu sira iha Oé-Cusse, nune’e iha futuru bele konsidera hodi hadi’a setór justisa iha Timor-Leste.
“Vizita ne’e importante maka nasaun kria komisaun ida-ne’e, agora ita hein rezultadu saida maka atu hetan hosi ezisténsia komisaun ne’e, hanesan autoridade judisiáriu mudansa atu hadi’a sistema iha judisiáriu, ida-ne’e importante, hotu-hotu hein ida-ne’e.”
Notísia relevante: MJ fiar Lucia Lobato sei fó susesu ba servisu reforma iha setór justisa
Rekorda katak, Primeiru-Ministru Xanana Gusmão, liuhosi despaxu númeru 03/PM/VIII/2023, nomea antiga Ministra Justisa, Lúcia Lobato, lidera ekipa atu halo reforma justisa no halo revizaun ba Planu Estratéjiku Dezenvolvimentu (PED) 2011-2030 iha setór justisa nian.
Jornalista: Abílio Elo Nini
Editór: Evaristo Soares Martins
