DILI, 29 fevereiru 2024 (TATOLI)–Vise Primeiru-Ministru (PM) Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, kinta ne’e, halo enkontru ho líder National Cooperative Business Association (NCBA) no Kooperativa Kafé Timor (CCT, sigla portugés).
Jerente CCT, Felisberto Pereira Pinto, relata, durante enkontru Vise PM enkoraja NCBA ho ninia parseiru CCT atu kontinua sosa produtu agrikultór hodi nune’e bele motiva liután prodús barak hodi sustenta ekonomia família.
“Objetivu hasoru malu ho Vise Primeiru-Ministru hodi relata progresu serbisu kona-ba kafé nomós produtu sira ne’ebé ho valór ekonomia a’as, pur ezemplu hanesan baunilla no kakau. Tanba semana rua liubá Vise Primeiru-Ministru asiste esportasaun dahuluk produtu kakau hosi Timor-Leste bá Singapura,” Felisberto Pereira, informa, hafoin ramata reuniaun, iha Gabinete Vise PM, Palásiu Governu.
Notísia relevante : CCT Hola Ona Kafé Tonelada 15.400 Husi Agrikultór Sira
Aleinde ne’e, governante ne’e husu atu NCBA selebra akordu ida ho Ministériu Dezenvolvimentu Rurál no Abitasaun Komunitáriu atu implementa atividade sira.
Vise PM hamutuk ho ekipa halo ona vizita iha fatin balun no nota katak produtu hanesan kakau barak iha área Tunu-Bibi (Maliana), Natarbora (Manatuto), Belaluhu (Manufahi), no Luto (Lautén). Ho ida-ne’e tempu badak parte rua sei asina akordu ida hodi implementa programa.
NCBA halo ona esportasaun kafé bá rai-li’ur kontentór 37 ka tonelada 2.000-resin durante tinan 2023 inklui halo mós esportasaun Baunilla hamutuk tonelada 8 no kakau tonelada 23. Daudaun prepara hela atu halo esportasaun pimenta ba dahuluk.
Nasaun ne’ebé NCBA halo esportasaun kafé mak Estadu Unidu Ámerika (kompradór prinsipál Starbuck), Canadá, Nova Zelándia no Austrália. Kakau foin dahuluk halo esportasaun bá Singapura, enkuantu baunilla no cenkeh esporta ba Amérika.
“Rezultadu hosi produtu sira ne’e ha’u hanoin lori retornu di’ak, importante maka ita-nia agrikultór sira sente rasik tanba ami lori osan cash hodi sosa sira-nia produtu, katak ba hasoru direta sira iha sira-nia to’os laran, tetu sira-nia produtu no entrega direta osan ba sira,” nia fó sasin.
Kafé kada kilograma sentavu 50 enkuantu baunilla kada kilograma $10, cengkeh kilograma ida $7, kakau kilograma ida $2,25, bazeia ba folin merkadu internasionál.
“Vantajen ida hodi ita sai ona membru Organizasaun Mundiál Komérsiu (OMK) ne’e maka Timor-Leste sei kompete ho kompañia internasionál tanba produtu sira ne’ebé CCT prodús hamutuk ho ninia parseiru NCBA hotu iha esportasaun, signifika iha merkadu internasionál, folin depende ba iha ne’ebá,” nia tenik.
Jornalista : Antónia Gusmão
Editora : Julia Chatarina
