DILI, 13 marsu 2024 (TATOLI)–Portavós Ekipa Integradu Saúde iha Ministériu Saúde, Vidal de Jesus, hateten Hospital Nasionál Guido Valadares (HNGV, sigla protugés) maske laiha reajente ba teste raan ba ema moras ho hepatitis B maibé laboratóriu nasionál sai alternativa hodi ajuda halo teste moras refere.
“Iha ona solusaun, tanba laboratóriu nasionál iha ona mákina ne’ebé bele ajuda Ospitál Nasionál hodi responde ba reajente sira-ne’e, tanba ema sira-ne’ebé halo doasaun raan, teste uluk moras sira-ne’e hotu mak sira fó raan ba pasiente,” Portavós Vidal de Jesus hateten ba jornalista sira liuhosi liuhosi konferensia imprensa, iha Kampu Alor, kuarta (12 marsu 2024) ne’e.
Nia esplika, maluk sira-ne’ebé ba halo doasaun raan iha HNGV tenke halo teste raan liuliu ba moras hepatitis B ne’ebé konsideradu labele falla iha ne’ebá, se lae atu fó raan ba ema la’ós ajuda ema ba lae maibé estraga tan pasiente.
Nia garante, HNGV ho Institutu Nasionál Farmasia no Produtu Medikamentu servisu hamutuk hodi kontinua halo prosesu akizisaun ba iha reajente.
“Reajente iha lista, maibé laboratoiu nasionál sira ajuda ona, ne’ebé laiha problema maibé ita hein stock ne’ebé INFPM prosesa hela Prosesu ba kompras la’o hela tanba kestaun prosesu ne’e han tempu iotoan,” nia hateten.
Jornalista : Jesuína Xavier
Editór : Cancio Ximenes
