BOBONARO, 12 marsu 2024 (TATOLI)-Ministru Agrikultura, Pekuária, Peska no Floresta, Marcos da Cruz, hateten projetu konstrusaun irrigasaun Maliana II daudaun ne’e iha ona prosesu konkursu no posiblidade sei implementa iha tinan ne’e.
Notísia relevante: CAFI aprova ona projetu irrigasaun Maliana II
“Agora daudaun tenderizasaun (konkursu públiku) loke ona, ne’ebé iha tinan ida-ne’e, ita bele komesa ona Maliana II ne’e,” nia hato’o asuntu ne’e liuhosi serimónia kolleta Hare iha aldeia Raifun Vila, sukun Raifun, postu administrativu Maliana, tersa ne’e.
Governante ne’e hatutan, irrigasaun ne’e sei fornese bee ba natar ektare 1,400 resin.
“Ita espera depois konstrusaun irrigasaun Maliana II, povu iha-ne’e bele prodús barak liután,” Ministru Marcos hateten.
Hosi parte seluk, Prezidente Kámara Komérsiu Timor-Leste, Munisípiu Bobonaro, Santina Mafalda, espera governu bele aselera projetu refere, nune’e bele fornese bee ba natar sira-ne’ebé pertense ba irrigasaun Maliana II.
“Ita haree Hare iha Tunubibi ne’ebá ne’e, sira halo ekatare balun de’it, seluk sira husik hela, sira la halo tanba problema irrigasaun, sira atu halo tinan ida dala rua mós labele, tanba bee laiha,” nia katak.
Enkuantu antes ne’e, Ministru Marcos, hateten orsamentu ne’ebé prevee iha Bill Off Quantity (BOQ) ba projetu ne’e hamutuk millaun $11.
Notísia relevante: ADN aprova ona projetu irrigasaun Maliana II
Jornalista: Sérgio da Cruz
Editór: Evaristo Soares Martins
