DILI, 14 marsu 2024 (TATOLI) – Implementasaun programa kuda kafé mahon iha munisípiu ualu ne’ebé responsabiliza husi Sekretaria Estadu Ambiente iha Governu anteriór nia tempu kuda ona plantasaun hamutuk rihun 800 iha tinan kotuk.
Diretór-Jerál Floresta, Raimundo Mau, hatete programa ne’e implementa ho alokasaun orsamentu hamutuk millaun $2,1, ne’ebé mai husi orsamentu retifikativu 2022 no kuda ona ai-kakeu, ai-matan dukur no ai-samtuku iha Ermera, Liquiçá, Aileu, Ainaro, Bobonaro, Manufahi, Dili no Baucau, nune’e bele fó mahon ba káfe sira hodi garante ninia produsaun iha futuru.
“Programa kuda káfe mahon ne’e Ministériu Agrikultura no Ambiente mak implementa bazeia ba programa no orsamentu mai husi retifikativu 2022 nian. Husi osan sira ne’e aloka mai Ministériu Agrikultura ba Diresaun Floresta hodi ezekuta programa reabilitasaun ba káfe hamutuk millaun $4 no ba Sekretáriu Estadu Ambiente hodi ezekuta peograma kuda káfe mahon hamutuk millaun $2,1”, Raimundo Mau relata ba Tatoli, ohin.
Nia salienta katak husi implementasaun programa refere kuda ona ai hamutuk rihun 800 no daudaun plantasaun sira ne’e hatudu ona progresu. Sira moris ho di’ak no fó ona protesaun ba kafe rihun 700 ne’ebé kuda ona iha rai ektare rihun 8.
Diretór Nasionál Alterasaun Klimátika iha Ministériu Turizmu no Ambiente, João Carlos Soares, realsa katak programa kuda káfe mahon ne’e implementa husi parte rua mak husi Diresaun Floresta ne’ebé haree ba káfe oan no parte Ambiente maka kuda ai-oan hodi fó mahon ba káfe sira.
João dehan implentasaun programa kuda kafe mahon iha Munisipiu uala ne’e parte ida atu asegura produsaun káfe iha tinan naruk, tanba káfe sira-nia dezenvolvimentu ne’e presiza klima ida mahon-malirin no fatin sira ne’e bele rai mahobeen, nune’e bele fó moris di’ak ba káfe sira.
Programa sira ne’e implementa hotu ona no responsabilidade husi parte rua nian mak kontinua halo observasaun ba progresu kafé no ai sira ne’ebé kuda ona atu labele hetan estragu. “Rezultadu kuda ai-oan ne’e tinan ida ho balun ona, ai sira ne’e moris di’ak loos no fó mahon duni ba kafé-oan sira ne’ebé parte Floresta kuda ona”, dehan.
Notísia relevante: MAPPF halo ona pagamentu 40% ba reabilitasaun kafé
Jornalista: Tomé Amado
Editora: Maria Auxiliadora
