iklan

BAUCAU, HEADLINE, MUNISÍPIU, SAÚDE

Funsionáriu kontratadu saúde Baucau sei dezloka ba área rurál

Funsionáriu kontratadu saúde Baucau sei dezloka ba área rurál

Funsionáriu kontratadu saúde Baucau, aprezenta aan iha servisu munisipál saúde iha Vila Antiga, segunda (18/03). Imajen espesiál.

BAUCAU, 18 marsu 2024 (TATOLI) – Servisu Munisipál Saúde Baucau (SMSB) sei dezloka funsionáriu kontratadu ba área rurál bazea ba kompromisu ne’ebé mak iha.

Diretór Servisu Munisipál Saúde Baucau, Cristiano Cipriano Belo, esplika funsionáriu hirak-ne’e pasa iha teste vaga ne’ebé fó-sai hosi Ministériu Saúde (MS) ho objetivu hatán ba menus rekursu umanu iha fasilidade saúde hanesan postu no sentru saúde sira.

“Sira-ne’e sei koloka ba fasilidade saúde ne’ebé seidauk kompleta ho pesoál saúde, sira sei moris ho komunidade hodi fo asisténsia saúde tuir kna’ar saúde nian,” Diretór Servisu Munisipál Saúde Baucau hetan iha Vila Antiga, segunda ne’e.

Funsionáriu hirak-ne’e komposta hosi profisionál saúde hanesan médiku jerál, enfermeira, promosaun saúde no farmasia ne’ebé daudaun iha ona servisu saúde munisipál no tuir planu sei asina kontratu iha semana-oin inklui sei hahú serbisu efetiva iha inísiu fulan-abríl.

Cristiano Belo, husu funsionáriu refere liuliu pesoál saúde sira atu serbisu ho responsabilidade nune’e sei ba terrenu hodi haforsa asisténsia saúde ba komunidade sira hodi atende komunidade.

“Ba rekursu, ha’u garante ona, entaun sira mai ne’e hakarak ka lakohi tenke prienxe fasilidade sira-ne’ebé ema seidauk iha,” Cristiano Belo akresenta.

Tuir dadus totál funsionáriu foun ne’ebé fó-sai hosi Servisu Munisipál Saúde Baucau hamutuk 80 komposta hosi médiku na’in-neen, enfermeiru 27, parteira 17, promosaun saúde ka saúde públiku sia, farmasia haat, tékniku administrasaun ualu no cleaner hamutuk na’in-sia.

Enkuantu tuir dadus ne’ebé fó-sai hosi Ministériu Saúde, katak funsionáriu ne’ebé liu vaga munisípiu Baucau hamutuk na’in-89, komposta hosi médiku na’in-neen, enfermeira 27, parteira 17, saúde públika 11, farmasia haat, tékniku administrasaun ualu, cleaner sia no suplente na’in-hitu.

Funsionáriu hirak-ne’e tuir planu sei destaka ba fasilidade saúde iha munisípiu Baucau hanesan sentru saúde sia no postu saúde hamutuk 31 iha postu administrativu neen.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!