DILI, 26 marsu 2024 (TATOLI) – WaterAid hanesan NGO ida ne’ebé introdús plataforma no apoiu jestaun rekursu bee ba Munisípiu Liquiça no Manufahi.
“Atividade ida ohin ne’e ita hanaran haforsa plataforma rekursu bee nian, mak WaterAid rasik servisu ba bee no saneamentu iha Timor Leste. Ita hanoin katak ita halo jestaun ba rekursu bee iha timor, ita presiza mós introdús plataforma no mós bele apoia hodi halo jestaun ba rekursu bee ne’ebé, mak iha ita-nia rain liuliu iha Munisípiu Liquiça no Manufahi”, Ofisiál Seniór ba parseria WaterAid iha Timor Leste, Jose Amaral, informa ba jornalista sira hafoin workshop nasionál kona-ba haforsa plataformaa rekursu bee, iha salaun CNE, ohin.
Amaral afirma, akontesimentu mudansa klimátika afeta tebes ba rekursu bee iha Timor-Leste, tanba ne’e, WaterAid servisu hamutuk ho parseiru sira hanesan PERMATIL no SIMILI hodi bele introdús plataforma ruma hodi apoia ba jestaun rekursu bee.
“Ami servisu hamutuk ho PERMATIL hodi introdús plataforma ida ho naran natural reservation ne’ebé mak baibain ita hatene kee iha bee matan sira ne’ebé mak iha, atu nune’e hamoris fila fali bee matan sira bele apoiu ba kuantidade bee matan sira, hodi fornese bee ba komunidade sira-nia nia nesesidade lorloron nian”, nia afirma.
Aleinde ida-ne’e, WaterAid servisu hamutuk ho Empreza Simili hodi introdús teknolojia ne’ebé mak bele sukat nivel bee iha tanke sira no mós atu haree katak bee ne’e iha tanke nakonu ka lae, se nakonu karik oinsá mak bele jere hodi bee to’o ba komunidade sira hodi utiliza lorloron.
“Ami hanoin munisípiu hotu presiza apoiu ba ne’eba maibé tanba kapasidade ajénsia ami labele kobre territóriu tomak, tanba ne’e ami rekomenda nafatin ba Governu liuhosi meiu oinsá mak atu haforsa servisu ne’e”, nia esplika.
Nia haktuir, Munisípiu Liquiça ho Manufahi ho totál populasaun 84% mak asesu ona bee moos no hela 16% mak seidauk asesu, tanba ne’e, Governu ho ajénsia servisu hamutuk atu apoiu hodi bele atinje meta 100% iha 2030, kona-ba asesu bee moos ho di’ak.
Iha fatin hanesan, Diretór Ezekutivu, PERMATIL, Ego Lemos, informa PERMATIL halo investimentu maka’as ona iha infraestutura bee maibé haluhan atu tau atensaun ba restaurasaun rekursu bee ne’e rasik.
”Ami foti inasiativu hodi halo parseria ho organizasaun oioin inklui ho Governu hodi halo mobilizasaun juventude sira hodi koopera hamutuk ho parte autoridade lokál, relijiozu, uma lisan iha TL oinsá mak bele konbina fila fali matenek lokál ne’ebé mak ita iha, atu reabilita fila fali ita-nia debu naturál sira ne’ebé mak uluk karau timor sira kria, ita koko reabilita fali hodi sai hanesan basia boot ida hodi kaptura udan been hodi infiltra ba rai laran hodi bele hamoris ita-nia rekursu bee”, Ego esplika.
Xefe Gabinete husi Sekretáriu Estadu Eletrisidade Agua no Saneamentu, Luis Nascimento, dehan atividade ida-ne’e importante tebes atu konserva bee-matan sira ne’ebé mak iha hodi fornese ba popualasaun sira ne’ebé falta bee moos.
Jornalista : Felicidade Ximenes
Editór : Zezito Silva
