iklan

BAUCAU, HEADLINE, MUNISÍPIU, SEGURANSA

PNTL Baucau rejista kazu 41 iha marsu

PNTL Baucau rejista kazu 41 iha marsu

Komandante PNTL Munisípiu Baucau, Superintendente Xefe Antoninho Mauluta. Imajen Agência TATOLI/Natalino Belo.

BAUCAU, 01 abríl 2024 (TATOLI) – Komandu Polísia Nasionál Timor-Leste (PNTL) munisípiu Baucau durante fulan-marsu rejista kazu hamutuk 41.

Komandante PNTL Munisípiu Baucau, Superintendente Xefe, Antoninho Mauluta, esplika, hosi totál kazu sira-ne’e, kazu violénsia doméstika mak okupa numéru dahuluk hamutuk 20, ofensa integridade fízika 11, danu iha kazu rua , arma branka rua, violénsia seksúal ida, koasaun seksuál ida, aktu seksúal ba adolezente ida, alfándega ida, ameasa ida no arte-marsiál ida.

“Hosi kazu hirak-ne’e aas oituan mak ofensa integridade fízika, asalta malu deskonfia hosi membru grupu arte-marsiál,” Komandante PNTL Munisípiu Baukau hateten iha Vila Nova, segunda ne’e.

Kazu ofensa intergridade fízika deskonfia envolve hosi membru grupu arte-marsiál ne’ebé lansa provokasaun hosi rede sosiál nune’e hamosu tuda-malu hanesan iha área Vila Nova no Adarae iha suku Bahu, postu Baucau Vila.

Autór ba kazu referidu maihosi membru arte-marsiál balun tanba sadik baku malu no ikus tuda malu.

“Kazu sira-ne’e ita relata hotu ona ba Ministériu Públiku hamutuk 38 rejista hotu ona, tolu sei iha prosesu investigasaun,” Superintendente Xefe Antoninho Mauluta akresenta.

PNTL Baucau nafatin halo patrulla no rejista kazu simples balun kontinua akontese maibé jeralmente situasaun durante selebrasaun festa páskua iha munisipiu Baucau kontroladu tanba membru sira mantein seguransa iha terrenu.

Alende ne’e, kumpre ho halo tuir tátika operasaun komandu PNTL munisípiu Baucau ne’ebé aprova hosi komandu jerál PNTL kona-ba misa páskua.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!