COVALIMA, 03 Abríl 2024 (TATOLI) – Diretora Servisu Edukasaun Munisipál Covalima, Elda de Fátima, klarifika informasaun iha rede sosiál ne’ebé hateten katak alunu sira husi Ensinu Báziku Filiál (EBF) Ucecai la realiza ezame ba períodu dahuluk.
“Informasaun iha mídia sosiál katak alunu Eskola Bázika Filiál Ucecai la tuir ezame tanba laiha profesór ne’e laloos, tanba nia la hatene kurríkulu nia orientasaun ba alunu no profesór sira”, Elda hateten iha Santa Rosa, ohin.
Tuir kurríkulu Ministériu Edukasaun (ME), alunu Ensinu Báziku Sentrál EBC primeriu to’o sestu anu hala’o de’it avaliasaun kontínua, maibé ezame fó de’it ba alunu sira husi husi terseiru siklu.
Bazeia ba observasaun hosi Servisu Edukasaun Covalima, laiha eskola ida mak la realiza ezame ba alunu terseiru siklu ne’ebé hahú iha 01 no remata iha 06 Abríl.
Totál estudante iha EBF Ucecai hamutuk 34 no profesór na’in-rua, maibé foin lalais koordenadór eskola mate, tanba ne’e edukasaun mós iha ona planu atu aumenta tan profesór ida.
Eskola ne’ebé eziste iha Covalima hamutuk 134, husi númeru referidu pre-eskolár públiku hamutuk 36, EBC 24 ho nia filiál 74 , eskola sekundária lima no tekniku-vokasionál tolu, ho totál profesór permanente hamutuk 686 no manorin ne’ebé tama iha lista ingresu espesiál 300-resin, husi númeru ne’e seidauk sufisiente no presiza atu aumenta profesór ba disiplina lian portugés, tetun, desportu no seluk tan.
Mentór Juvito Correia reforsa katak, bazeia ba kurríkulu, alunu husi pré-eskolár no tékniku-vokasionál la realiza ezame, maibé hala’o ezame períodika hodi uza de’it modulár, tanba nia lisaun kada disiplina la hanesan.
“Métodu ezame ba iha EBF siklu dahuluk no daruak nia uza sistema rua – avaliasaun kualitativu válidu ba klase ida no rua ne’ebé ita bolu dehan avaliasaun kontínua. Alunu klase tolu to’o neen ita bolu avaliasaun formativa formál. Nia la’o ho grella rasik, maibé ba disiplina matemátika hala’o teste datoluk no avaliasaun formativa formál akontese ba daruak, soma hamutuk foin ita hetan nia valór formativa”, esplika.
Mekanizmu ezame ba alunu EBF la hanesan ho alunu terseiru siklu, tanba sistema Ministériu Edukasaun no nia kaléndáriu edukasaun kada tinan la inklui alunu pré-eskolár, primeiru siklu to’o sestu anu no alunu husi Eskola Tékniku-Vokasionál (TECVOC).
Jornalista: Celestina Teles
Editora: Maria Auxiliadora
