VIQUEQUE, 04 abríl 2024 (TATOLI)— Komisaun Nasionál Eleisaun (CNE-sigla Postugés), kinta ne’e, lansa atividade edukasaun sívika nivél nasionál iha suku Builo, Postu Ossu, Munisípiu Viqueque hodi hasa’e tasa partisipa komunidade iha eleisaun suku ne’ebé akontese iha suku 10, realiza iha 27 Abríl 2024.
Iha lansamentu ne’e, Prezidente CNE, José Belo, enkoraja ba komunidade hotu iha suku 10 ne’ebé atu partisipa eleisaun suku ne’e ho másimu hodi hili xefe suku sira ne’ebé iha konfiansa atu halo dezenvolvimentu iha suku.
Notísia relevante: Eleitór 33.176 husi suku 10 sei partisipa eleisaun iha fulan ne’e
“CNE ne’e introdús mandantu xefe suku tinan hitu no papél xefe suku importante iha baze nu’udar liman ain Governu nian, maske ema haree ki’ik, maibé ho ninia responsablidade bo’ot. Nune’e ba eleitór suku Builo no suku sia seluk, tempu eleisaun tenke ezerse diretu hodi determina ita-nia lideransa iha suku ida ne’e”, Prezidente CNE enkoraja bainhira lansa atividade edukasaun sívika iha Suku Builo, Ossu.
Iha fatin hanesan, PAM munisípiu Viqueque, Francisco Cruz Simdes de Gonzaga Soares, agradese ba CNE ne’ebé kontinua fó apoiu dezamina informasaun ne’ebé loos ba eleitór sira liu liu liga elesaun komunitária iha suku Builo.
“Ha’u sente informasaun sira-ne’ebé husi CNE ba eleitór sira ne’e loos. Tanba ne’e autoridade Viqueque apoia tomak ba CNE. Nune’e mós ha’u husu ba abitante Viqueque tomak kontinua fó apoia ba dezenvolvimentu”, nia afirma.
Iha fatin hanesan, Komadante PNTL munisípiu Viqueque, Superitendente Antonio Rego Fernandes, hateten, eleisaun komunitária ne’ebé sei realiza loron 27 fulan-Abríl 2024, PNTL sei kolola membru sira hodi asegura seguransa perante iha eleisaun referidu.
“Munisípiu Viqueque tinan ida-ne’e suku Builo maka tuir eleisaun. Ba eleisaun komunitária ida-ne’e ami sei garante seguransa no sei koloka membru sira hodi asegura establidade iha suku laran, atu eleisaun bele la’o hakmatik no livre”. Tenik nia.
Tuir dadus husi Sekretariadu Tékniku Administrasaun Eleitorál (STAE) hafoin atualiza dadus eleitór munisípiu haat hanesan Dili, Viqueque, Aileu no Manatutu, akumula númeru eleitór hamutuk 33.176 mak sei ezerse sira-nia direitu votu iha 27 Abríl.
Orsamentu ne’ebé prepara ba eleisaun suku sanulu iha tinan ne’e, antes ne’e prevee $182.709,50 maibé hafoin haree númeru eleitór aumenta, maka osan sai $276.165. Aleinde ne’e, prepara mós urna 208 no kabina votu 260.
Eleisaun tinan ne’e iha suku 10 ho ninia aldeia hamutuk 53 mak hanesan munisípiu Dili postu administrativu Cristo Rei suku ida mak Ailoc ho ninia aldeia hamutuk lima, postu administrativu Don Aleixo suku mak Bebonuk, Madohi no Manleuana aldeia hamutuk 28, postu administrativu Metinaro suku ida mak Mantelolão aldeia hamutuk neen.
Ba munisípiu Aileu postu administrativu Laulara mak suku Bocolelo, aldeia hamutuk haat, postu administrativu Aileu suku Lequitura iha aldeia haat, munisípiu Manatuto postu administrativu Lacló suku Laicore, aldeia haat, suku Uma-Caduac aldeia ida, no postu administrativu Barique, suku Sikone-Diloli, aldeia hamutuk rua no munisípiu Viqueque postu administrativu Ossu, suku Builo aldeia haat.
Notísia relevante : MAE-STAE sei kria mekanizmu fasilita eleitór sira iha eleisaun suku
Jornalista : Vitorino Lopes da Costa
Editór : Florencio Miranda Ximenes
