DILI, 05 abríl 2024 (TATOLI)–Ministra Edukasaun (ME), Dulce de Jesus Soares, hateten kuadru pesoál ME identifika profesór kuaze 1.900 iha territótiu nasionál mak tama ona iha idade reformadu.
Notísia Relevante: Dadus provizóriu, ME identifika profesór reformadu kuaze 900
“Iha tempu badak ita sei halo enkontru ho Institutu Nasionál Seguransa Sosiál (INSS) atu responde ba númeru profesór ne’ebé tuir kuadru pesoal hatudu katak Ministériu Edukasaun iha profesór purvolta 1.900. La’ós de’it sira-ne’ebé idade reforma maibé iha mós profesór ne’ebé idade seidauk to’o maibé kondisaun saúde ne’ebé la saudável, ne’ebé la hanorin ona. Ita iha dadus hotu maibé presiza hala’o enkontru ho INSS maibé ita halo ida-ida tanba semana oin ita sei halo transferénsia profesór ne’ebé barak liu, ba eskola ne’ebé menus,” Ministra Edukasaun ne’e hateten ba Agencia Tatoli, hafoin atribui ekipamentu informátika no motorizada ba Eskola Ensinu Báziku Sentrál iha resintu ME, Vila Verde, kinta ne’e.
Governante hateten, bainhira ezame bolsa kandidatu profesór finaliza ona mak Ministériu Edukasaun sei koloka ba eskola ne’ebé profesór menus no presiza duni profesór.
“Ida-ne’e hotu mak hafoin ita tama ba asuntu idade reformadu ne’e,” nia dehan.
Diretór Jerál Edukasaun Pre-Eskolár, Ensinu Báziku no Ensinu Rekorente, Apolinário Serpa Rosa, hateten kuadru pesoál Ministériu Edukasaun (ME) hamutuk ho Komisaun Funsaun Públika (KFP) identifika profesór ne’ebé idade reformadu ona besik 2.000.
“Profesór idade reforma ne’e barak loos, tama ona ba reformadu maibé tanba lei seidauk permite, sira atu sai. Entaun, ohin. ha’u konversa ho Komisáriu Komisaun Funsaun Públika (KFP), José Telo, katak sira identifika ona profesór idade reformadu ona besik rihun rua, maibé sei hein desizaun hosi ME,” nia dehan ba Agencia Tatoli, iha nia knaar fatin, Vila Verde, sesta ne’e.
Diretór Jerál ne´e hatutan, profesór ne’ebé mak reformadu ona ne’e, ME iha mekanizmu ida, hodi halo identifikasan ba profesór reformadu no ida la saudável sira-ne’e nia matéria hodi fó ba profesór ativa sira atu kontinua hanorin iha saladeaula.
“Ita-nia diretór eskola sira sempre iha maneira oinsá mak bele taka fali profesór ne’ebé falta ka moras sira no balun ne’ebé mate tiha ona, ida-ne’e mak ita-nia mekanizmu,” nia dehan.
Iha parte seluk, Adjuntu Diretór Eskola Sekundáriu Jerál (ESJ) 4 Setembru UNAMET Balide, Alexandre Belo, husu atu aselera lei reforma obrigatóriu ne’e tanba profesór barak mak idade liu ona 60 ba leten.
“Ha’u hararak rekomenda ba Ministériu Edukasaun atu aselera lei reforma ne’e tanba iha eskola 4 Setembru UNAMET ne’e profesór na’in-neen ne’ebé idade reforma ona maibé sira sei hanorin, no sira-ne’e mós mesak lori matéria ezame nasionál nian hotu tanba ne’e presiza aseler. Nune’e, labele prejudika prosesu aprendizajen nian,” nia dehan.
Notísia Relevante: KFP sei aprezenta proposta-lei reforma obrigatóriu ba funsionáriu públiku
Jornalista : Osória Marques
Editór : Cancio Ximenes
