BAUCAU, 18 abríl 2024 (TATOLI) – Diresaun Rejionál Transporte Terrestre (DRTT) Munisipál Baucau durante trimestrál dahuluk arrekada rihun-$62.580.00 ba kofre Estadu.
Diretór DRTT munisípiu Baucau, Roberto da Cruz, esplika, osan hirak-ne’e hahú husi fulan-janeiru to’o marsu inísiu tinan-ne’e liuhusi kliente sira-ne’ebé trata dokumentu transporte inklui karta kondusaun.
“Totál fulan-tolu husi janeiru to’o marsu ita oferese reseita hamutuk $62,580.00,” Diretór Serbisu Diresaun Rejionál Transporte Terestre Baucau relata iha Vila nova, kinta ne’e.
Reseita ne’ebé DRTT arrekada hatama ba kofre Estadu husi fulan-janeiru hamutuk $24,675.00, fevereiru $21,017.50 no fulan-marsu $16,887.50 ne’ebé maihosi totál kliente hamutuk 4019, komspotu husi inspesaun, rejistu, karta kondusaun, inklui trajeitu públiku.
Husi tipu haat mak temin ne’e, DRTT halo inspesaun ba transporte públiku no privadu hamutuk 2554 ho nia orsamentu hamutuk $37,455.00, trajeitu públiku 283 ho orsamentu hamutuk $7,105.00, karta kondusaun hamutuk 585 ho totál orsamentu $10,140.00 no rejistu foun 597 ho orsamentu $7,880.00.
“Karta kondusaun, ita halo mós atendementu ba motorista sira husi Viqueque, Lautém inklui Baucau,” Roberto da Cruz akresenta.
DRTT Baucau fó atendementu ba kliente sira ne’ebé trata karta kondusaun husi Munisípiu tolu mak hanesan Munisípiu Lautem, Viquque inklui Manatuto, enkuantu inspesaun no trajeitu públiku iha kada munisípiu.
Notísia relevante:DRTT Baucau sei menus fasilidade serbisu
Jornalista : Natalino Belo
Editór : Rafael Ximenes de A. Belo
