MCI husu komunidade Ermera promove kafé durante feira
ERMERA, 25 abríl 2024 (TATOLI)– Governu liuhosi Ministériu Komérsiu no Indústria (MCI, sigla portugés), kinta ne’e, halo abertura ba feira, hodi komemora loron restaurasaun independénsia bad ala-22 (20 maiu 2002-20 maiu 2024), iha munisípiu Ermera.
Feira ho tema ‘Hamutuk ho Dame Promove Produtu Nasionál’, ne’e realiza iha Kampu Demokrasia Glenu, munisípiu Ermera. Ne’ebé abetura hosi Vise-Ministru Komérsiu no Indústria, Augusto Juniór Trindade, akompaña mós husi autoridade lokál Ermera nian.
Vise-Ministru hateten, Ermera riku ho kafé, tanba ne’e tenki promove nafatin produtu ne’e nomós produtu sira seluk hanesan rambutan, salak no sira seluk durante feira.
“Ermera riku ho kafé, maibé dala-ruma ema balun konsumu fali kafé husi rai seluk. Tanba ne’e, ho feira ida ne´e bele promove di’ak liután kafé no produtu sira selu hanesan rambutan, salak. No modo-tahan sira ne’ebé imi (populasaun) kuda”, Augusto Trindade apela.
Nia dehan, ekipa Ministériu Komérsiu no Indústria sei halo avaliasaun ba feira ida ne’e, kuandu iha rezultadu pozitivu maka governu sei realiza tan atividade hanesan hodi promove produtu lokál no hasa’e rendimentu negosiante sira ni’an.
Iha fatin hanesan, Xefe Grupu Juventude Promove Ortikultura (JPH, sigla portugés), Alberto Soares da Cruz, konsidera feira ne’e importante tebes tanba sira bele fa’an sira-nia produtu.
“Feira ne’e nu’udar oportunidade ida hodi ami bele promove ami-nia produtu sira, tanba ami iha produtu hanesan buah-naga, ailia, no modo-metan no mutin. Dadaun ne’e ami- nia grupu distribui modo sira ne’e ba iha loja iha Dili hanesan W-four, tanba kria grupu ne’e ho objetivu ajuda ekonomia família”, Alberto afirma.
Partisipa iha seremónia abertura ba feira ne’e mai hosi Ministru Ensinu Superiór, Siénsia no Kultura, José Honório da Costa Perreira Jerónimo, Sekretáriu Estadu Protesaun Sivíl, Domingos Mariano Reis, membru Parlamentu Nasionál, Autoridade munisipál, Polísia Nasionál Timor-Leste (PNTL), munisípiu Ermera, reprezentante FALINTIL-Forsa Defeza Timor-Leste (F-FDTL), no komunidade.
Notísia relevante: Aban, MCI abertura feira hodi komemora loron restaurasaun indepedénsia ba dala-22 iha Manufahi
Jornalistaː Domingos Piedade Freitas
Editoraː Isaura Lemos de Deus
