DILI, 03 maiu 2024 (TATOLI)–Estrutura Universidade Nasionál Timor Lorosa’e (UNTL), sesta ne’e, halo pre-lansamentu ba revista akadémika hanaran Sândalo, ne’ebé bele asesu via online ho link https://revistasandalo.com/index.php/revista/index , ho ninia publikasaun daudaun ne’e disponível ho lian rua, portugés no inglés.
Revista ne’e liga ho Fakuldade Edukasaun, Arte no Umanidade (FEAH, sigla portugés), ho nini publikasaun testu kona-ba peskiza, teoria, métodu no instrumentu iha área edukasaun iha nível oin-oin, ho temátika (1) edukasaun lian, artístika no interkulturál, (2) Edukasaun iha siénsia no matemátika, (3) Edukasaun no formasaun profesór no (4) Edukasaun fízika no desportu.
“Ha’u kontente tebes-tebes tanba finalmente Fakuldade Edukasaun iha nia revista rasik nune’e bele promove profesór no estudante sira-nia kapasidade analítiku eskrita, entaun ida-ne’e kontribui ba informasaun sira tanba bainhira estudante hakerek di’ak, monografia di’ak bele tau iha revista ne’e nomós profesór ne’ebé hakerek artigu di’ak,” Reitór UNTL, João Soares Martins, hateten, hafoin halo pre-lansamentu Revista Edukasaun Sândalo, iha Liceu UNTL.
Notísia relevante : Dekanu foun husu UNTL prevee fundu harii laboratóriu ba FEAH
Nia dehan, ba oin funsiona ona estudante no profesór bele transforma idea, opiniaun, artigu ruma, inklui atividade sira iha revista edukasaun ne’e, nune’e iha kedas ona publikasaun dahuluk liuhusi online.
Dekanu FEAH, Teodoro Soares, konsidera, revista ne’e hanesan meiu ida hodi fasilita publikasaun UNTL nian liuhusi online.
“Ohin pre-lansamentu ne’e ami públika ona artigu hitu, rua seluk sei iha prosesu edisaun. Hahú no to’o agora ezisténsia revista edukasaun Sândalo ne’e tinan-rua. Ekipa ne’ebé serbisu la’ós husi UNTL de’it, maibé husi Portugal, Brasil, España, América no nasaun seluk tan,” nia informa.
Objetivu prinsipál husi revista ne’e maka sei fasilita profesór sira-ne’ebé hanorin iha FEAH UNTL atubele ativamente halo investigasaun no públika nia rezultadu.
“Revista edukasaun Sândalo ne’e ita uza lian inglés, portugés, indonéziu no tetum, nune’e ema husi rai-li’ur mós bele asesu informasaun,” nia tenik.
FEAH hamriik tinan 24 ona, nune’e tenta atu halo revista ida la’ós iha nível nasionál de’it, maibé revista ho nível internasionál.
“Ohin esforsu ne’ebé durante ne’e iha, halo tinan barak no ohin tempu ida-ne’ebé kontente tanba bele halo pre-lansamentu ba revista edukasaun Sândalo,” nia orgullu.
Jornalista : Osória Marques
Editora : Julia Chatarina
