DILI, 04 abríl 2024 (TATOLI)—Ekipa futeból Unidade Espesiál Polisia FC halakon ekipa Laivai FC ho rezultadu 3-2 iha jogu kopa Maun Boot Kay Rala Xanana Gusmão ne’ebé hala’o iha Estádiu Munisipál Dili, sabadu ne’e.
Notísia Relevante: AS Cantada dudu-sees Dark Blue 3-2
Ho kontra atake ne’ebé ekipa rua halo foin minutu ida (1), jogadór UEP, Silveiro Garcia, xuta bola husi dook lees kedas rede Laivai hodi haturr rezultadu ba 1-0. Golu husi Garcia ne´e hanesan golu ne’ebé lais liu husi jogu ekipa rua nian.
Maske golu ho velosidade lais la hamate vontade jogadór Laivai nian. Maibé sira kontinua halo presaun makaas hodi lori no kedok bola ba-mai maibé ekipa UEP tenta halo mate tutuir jogu ne’ebé Laivai lansa.
Avansadu UEP nian halo kontra atake ne’ebé makaas hasoru Laivai maibé xutu barak mak la kona iha alvu. Bola ne´ebé sira xuta, defeza ekipa Laivai konsege hamate bola no balun Guarda Rede mak salva.
Jogu la’o manas liután, halo adeptus sira iha tribun leten hakilar makaas fó apoia makaas tuir ekipa ne’ebé sira gosta. Laivai nunka lakon vontade maske hasoru forsa makaas UEP nian. Sira kontinua esforsu ho kalma no la ansi atu hatama golu bainhira seidauk iha oportunidade ne’ebé di’ak.
Ho atake ne’ebé UEP halo la hela de’it hanesan atake, iha munutu hitu (7), jogadór J. Soares lees tan golu ida liuhusi xutu ho velosidade makaas halo Guarda Rede la antisipa ho di’ak ikus golu muda rezultadu ba 2-0.
Golu ne’e halo jogadór Laivai tenke servisu makaas, nune’e bele hatama golu atu halo empata no manán, maibé Laivai kontinua hatudu jogu bonitu iha ema hotu nia matan maske simu ona golu rua.
Jogu la’o to’o minutu 20, laiha tan golu ruma akontese maibé Laivai kontinua esforsu no ikus to’o iha minutu 23, jogadór A. Da Cruz utiliza oportunidade lansa xutu ida ba rede UEP halo Guarda Rede la antisipa ho di’ak bola tama liu ba rede laran muda rezultadu ba 1-2.
Golu ne’e seidauk kona iha tarjetu ekipa nian, halo Laivai tenke esforsu makaas liután. Treinadór Laivai buka maneira oioin atu halo mudansa ba jogu maibé UEP la hakfodak no tenta halo mate tutuir Laivai nia jogu.
Hetok aat liutan, iha minutu 35, jogadór UEP Silveiro Garcia hetan tan oportunidade fura tan rede Laivai dudu rezultadu ba 3-1. Golu ne’e halo kanek tebes Laivai nia laran. Atu halo oinsá, ekipa laivai hateke de’it ho nonok ba jogadór UEP ne’ebé halo selebrasaun ba golu vitória ne’e iha kampo ninin.
Husi golu Garcia nian ne’e mak termina jogu primeira parte nian, tanba laiha tan golu ruma mak akontese no árbitru deside pauza menutu 15 ba jogadór sira deskansa hafoin kontinua fali segunda parte.
Hakat ba segunda parte, ekipa rua kontinua ho kontra atake ne’ebé másimu, maibé UEP halo de’it defensivu la ansi halo golu hodi hamate tutuir jogadór Laivai nia jogu. Maibé Laivai utiliza opirtuniade ne’e hodi asalta makaas UEP nia liña defeza ikus iha minutu 80 jogadór J. Alves konsege responde golu ida muda rezultadu ba 2-3.
Ho Golu ne’e halo UEP mós trauma atu hela ho defensivu tenke muda estratéjia ba defensivu no ofensivu nune’e bele antisipa ho di’ak. Maibé to’o segunda parte termina, laiha tan golu ruma akontese, ikus vitória hela ba UEP no ekipa Laivai hela ho derrota hodi hein jogu seluk tuir mai.
Jogu ne’e dirije husi árbitru Bernanrdino Mascarinhas, juis liña Henrique Pereira, Ricardo Amaral no árbitru rezerva João Vieira.
Jornalista : Hortencio Sanchez
Editór : Cancio Ximenes
