OÉ-CUSSE, 08 maiu 2024 (TATOLI) – Embaixadór Repúblika Indonézia (KBRI,) iha Timor-Leste, Okto Dorinus Manik, kuarta ne’e, enkontru kortéjia ho Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, koordena atu loke Banku Repúblika Indonézia (BRI) sukursál iha Oé-Cusse.
Okto Dorinus Manik, hateten, objetivu harii banku BRI iha Oé-Cusse, atubele iha kompetisaun entre banku sira nune’e bele hatudu profisionál no fó oportunidade ba komunidade sira bele hili no asesu ba banku sira.
“Ami fó parabéns ba nomeasaun Prezidente Autoridade Oé-Cusse foun, ami fiar katak ba oin sei haforsa liután ita-nia serbisu hamutuk espesialmente ba setór ekonómia,” Okto Dorinus Manik, ba jornalista sira, hafoin enkontru iha Gabinete Autoridade Oé-Cusse.
Notísia relevante: RAEOA-KBRI diskute futuru kooperasaun iha setór edukasaun
Diplomata ne’e akompaña ho empreza estatál no privadu sira, hanesan BRI, PERTAMINA, Telkomcel, Banku Mandiri, atu haree oportunidade iha futuru kooperasaun.
“BRI loke ona nia sukursál iha-ne’e, maske foin hahú ho tipu telefone-banking, maibé futuru sei koordena Prezidente Autoridade ba fatin atu konstrui edifísiu BRI, ha’u hanoin planu ne’e presiza apoia, tanba durante ne’e iha mós empreza estatal Waskita Karya halo konstrusaun atu liga konetividade entre Oé-Cusse ho NTT, tanba konetividade ne’e importante sirkulasaun ekonomia rai rua nian,” nia informa.
Prezidente Autoridade RAEOA, Rogério Tiago Lobato, agradese, tanba Indonézia nu’udar país ida, belun di’ak ho Timor-Leste, tenke halo kooperasaun di’ak asuntu investimentu saida de’it.
“NTT viziñu hela ho ita, embaixadór nia reprzentante Indonézia nian iha Timor, ohin mai iha ne’e, ho vontade ida hakarak atu halo kooperasaun di’ak ho RAEOA, ita prontu atu kolabora, ba fatin, ami aloka ona ho Sekretáriu Rejionál Terra no Propriedade, agora hela de’it asina kontratu arrendamentu, bainhira asina ona sira bele halo ona konstrusaun, ha’u hanoin ne’e investimentu di’ak,” nia katak.
Notísia relevante:Oé-Cusse oan na’in-hitu hetan bolsa estudu hosi UNIMOR Indonézia
Jornalista: Abílio Elo Nini
Editór: Evaristo Soares Martins
