OÉ-CUSSE, 21 jullu 2023 (TATOLI) – Embaxadór Repúblika Indonézia (KBRI) ba Timor iha Oé-Cusse, Bonifasius Agung Nugroho, kinta ne’e realiza enkontru kortejía ho Autoridade Rejiaun Administrativa Espesiál Oé-Cusse Ambeno (RAEOA) hodi diskutie ba futuru kooperasaun iha setór edukasaun.
Prezidente Autoridade RAEOA, Arsénio Paixão Bano, informa, iha oportunidade enkontru kortejía ho KBRI, diskute posibilidade atu kontinua promove relasaun ba setór edukasaun.
“Iha ohin ne’e, ha’u mós fó sujestaun, sei delegasaun hosi UNIMOR bele mai vizita RAEOA ho delegasaun ita-nia hosi parte edukasaun nian mós ba, atu haree nível kooperasaun saida mak ita bele halo, sira-nia sujestaun sira-bele haruka estudante sira mai halo estájiu iha Oé-Cusse, ita nakloke atu diskute ba asuntu ida-ne’e, ne’ebé iha deskusaun ami fokuliu oinsá dudu edukasaun ne’e ba oin,” Prezidente Autoridade RAEOA, Arsénio Paixão Bano, ba jornalista sira hafoin remata enkontru kortejía.
Tanba ne’e, iha oportunidade ne’e mós, diskute kona-bá fakuldade sira balu importante ba RAEOA, hanesan inglés ba setór saúde, agrikultura, ba Oé-Cusse apoia no nakloke.
“Ha’u mós hateten, katak delegasaun RAEOA nian mós bele ba, tanba besik, ida-ne’e ita bele ajuda malu, atu dudu setór rekursu umanu ne’e la’o, ha’u mós informa, iha RAEOA, ita mós iha hanoin atu harii universidade ida,” nia katak.
Tanba iha mandatu Governu anteriór, Autoridade koordena ona ho Ministériu Ensinu Superiór Siénsia no Kultura (MESSK) ho UNTL, bele kontinua no servisu hamutuk harii universidade Oé-Cusse nian tanba rai no fatin prepara ona, hela de’it halo planu atu realiza.
Iha opurtunidade ne’e, KBRI sujere ba Autoridade RAEOA, atu kontinua destaka no konstrui ona postu integradu iha fronteira Oésilo, nune’e bele fasilita movimentasaun, tanba durante ne’e odamatan ida de’it liuhosi fronteira Sakato.
“Ha’u responde kedas, postu integradu ne’e prosesu aprovizionamentu komesa la’o ona tanba iha projetu boot rua nívél rejionál ho nasionál ita halo daudaun, ida mak estrada Tono ba Oésilo ida maka postu integradu ita-nian, ida-ne’e, ha’u hatete, ami husu muda fali dezeñu dala-haat ona tanba, ha’u hanesan reprezenta Estadu Governu Sentrál iha RAEOA, ha’u hakarak ita-nia dezeñu ne’e la lakon ho sira sorin,” nia katak.
Embaxadór Repúblika Indonézia (KBRI) ba Timor-Leste iha Oé-Cusse, Bonifasius Agung Nugroho, agradese iha futuru estudante sira hosi Indonézia bele halo estájiu komunitáriu iha RAEOA.
“Ohin ami mós informa, atividade sira ba futuru, ne’ebé ami prioridade liu kona-bá planu atu realiza estájiu iha Oé-Cusse hodi estudante sira mai hosi Indonézia, ne’ebé estájiu estranjeiru ne’e, depois sai hanesan programa, atu estudante sira hosi Indonézia bele halo asaun apoia ba komunidade sira,” nia afirma.
“Hanesan UNIMOR tanba distánsia besik, ida-ne’e bele fó apoia ba malu, ezemplu bele apoia ba manorin programa sira kona-bá edukasaun no seluk-tán, ida-ne’e maka ohin ami dekuti durante iha enkontru ofisiál ne’e,” nia katak.
Notísia relevante: KBRI selebra “Bulan Bahasa” ho kompetisaun konta istória tradisionál iha RAEOA
Jornalista: Abílio Elo Nini
Editór: Evaristo Soares Martins
