OÉ-CUSSE, 15 maiu 2024 (TATOLI) – Sekretáriu Rejionál ba Asuntu Terra no Propriedade, Marcelino Marques Coro, fó-sai katak, iha mandatu sei regulariza didi’ak sidadaun, kompañia no organizasaun sira-ne’ebé utiliza arrendamentu rai Estadu iha Rejiaun Administrativa Espesiál Oé-Cusse Ambeno (RAEOA) nune’e bele kontribui reseita ba kofre Estadu.
“Arrendamentu rai Estadu, daudaun ita haree ona, iha mandatu autoridade anteriór, dalaruma pendente barak ba arrendamentu, tanba ladún tau atensaun ba arrendatáriu sira atu regula arrendatáriu sira ho didi’ak,” Marcelino Coro, ko’alia iha Oé-Cusse, kuarta ne’e.
Notísia relevante: SETP koordena Autoridade RAEOA atu uniformiza Servisu Terra no Propriedade
Tuir nia, agora daudaun, sira (arrendatáriu) mai husu atu renova, maibé tuir lei tenke aplika koima kontribui ba kofre Estadu. Tanba tuir loloos Governu hanesan reguladór, tenke tau matan ba kontinuasaun, bainhira kontratu arrendamentu remata tenke kontinua kedas, tanba tuir lei antes fulan-tolu tenke hetan ona aprovasaun.
Nia fó ezemplu, iha kontratu dahuluk kada fulan selu $5, maibé bainhira kontratu foun fali, taxa ne’e tenki sa’e uitoan, tanba bazea lejizlasaun rai nian iha lei númeru 1/2003, loron 10 fulan-maiu no dekretu-lei númeru 19/2004, loron 29 fulan dezembru no lei númeru 12/2005, loron 12 fulan-setembru.
Nune’e mós kolektánia lejislasaun lei númeru 13/2017, loron 05 fulan maiu, kona-bá rejime espesiál definisaun titularidade bens movel, lei númeru 8/2017, loron 26 fulan-abríl kona-bá espropriasaun ba utilidade públika, lei númeru 6/2017, loron 26 fulan-abríl kona-ba baze ordenamentu territóriu.
“Ami-nia ekipa bens no moveis ho jurídiku prepara ona formatu bá arrendatáriu, ligasaun ho sistema nasionál nian, ita tenke mellora tanba ne’e hatama reseita ba kofre Estadu, entaun ita tenke regula ho didi’ak, nune’e ita-nia sidadaun sira-ne’ebé durante ne’e hela no arrenda ona rai Estadu, bens no moveis bele kontinua kontratu arrendamentu ne’ebé iha,” nia informa.
Membru Autoridade ne’e, sita, reseita ba kofre Estadu, Autoridade sesante rekolla hamutuk rihun $18-resin, maibé iha mandatu autoridade foun, seidauk bele relata ba públiku tanba sei rekolla hela dadus.
“Kontratu antes ne’e, dadus arrendatáriu hamutuk 90-resin mak hatama ona reseita ba kofre Estadu rihun $18-resin, agora daudaun iha ita-nia mandatu, kuaze liu ida-ne’e tanba ema barak mak mai ona, husi kompania organizasaun husu atu arenda rai Estadu, maibé ha’u seidauk asina kontratu ne’e tanba tenki mellora, nune’e kontinuasaun ne’e labele iha faillansu, ” nia katak.
Notísia relevante: Autoridade RAEOA hahú rekolla dadus hafoin halo pagamentu ba komunidade afetadu projetu ZEESM
Antes ne’e, Sekretáriu Estadu Terra no Propriedade (SETP), Jaime Xavier Lopes, hala’o enkontru koordenasaun ho Prezidente Autoridade RAEOA, Rogério Tiago Lobato, kona-bá planu ba futuru uniformiza serbisu terra propriedade nian entre RAEOA ho Governu Sentrál.
Jornalista: Abílio Elo Nini
Editór: Evaristo Soares Martins
