DILI, 18 maiu 2024 (TATOLI) – Claudio Osorio, timoroan no jogadór ida, ne’ebé mak nia tempu labarik no foinsa’e iha Reinu Unidu, sei fila hikas mai Timor-Leste – rai moris fatin, hodi reforsa selesaun nasionál.
Jogadór timoroan ne’ebé antes ne’e joga iha liga Inglaterra ho klube naran Reading FC ne’e fila fali mai tanba bolu hosi Treinadór selesaun nasionál, Simón Elisetche, atu reforsa selesaun nasionál iha eventu importante rua ne’ebé sei akontese iha tinan ida-ne’e.
“Iha ha’u-nia lideransa nakloke ba jogadór timoroan se de’it mak iha kbiit atu mai reforsa selesaun nasionál. Ha’u nafatin akompaña kompetiasaun nasionál sira no jogadór sira ne’ebé agora daudaun joga iha liga sira rai-li’ur ne’e,” treinadór Xileno ne’e katak ba Agência TATOLI, sábadu-kalan, via media sosial WhatsApp.
“Sira ne’ebé di’ak ita tenke bolu hotu mai selesaun atu nune’e bele hasa’e ita-nia ranking FIFA. Claudio Osorio ita iha ona kontaktu ho nia no semana oin nia bele treinu hamutuk ona ho ita,” nia reforsa tan.
Treinadór ho tinan-47 ne’e dehan, objetivu preparasaun selesaun agora atu hasoru kompetisaun rua hanesan, kualifikasaun Mitsubishi Electric Cup ne’ebé Timor-Leste sei kontra Brunei Darusalam iha fulan-jullu no kualifikasaun Asian Cup Arab Saudi 2027 ne’ebé Timor-Leste sei kontra Mongolia fulan-setembru.
Antes ne’e, jogadór jerasaun husi Munisípiu Manufahi no Baucau ne’e joga iha selesaun nasionál Inglaterra U-16-17.
Claudio nia Papa husi Munisípiu Baucau no mama husi Munisípiu Manufahi no Claudio hela kle’ur ho nia mama iha Inglaterra no boot iha Inglaterra maibé jogadór ne’e raan Timor puru.
Tuir informasaun, jogadór Claudio mós pra kontratu ona ho klube Timor-Leste Karketu Dili FC bainhira liga iha Timor-Leste la’o nia sei joga iha klube kapitál Dili ne’e.
Se mak Claudio Osorio?
Tuir infomasaun ne’ebé TATOLI asesu, Claudio Osorio, moris iha Timor-Leste no hamutuk ho família muda ba Irlanda Norte ho tinan neen hodi buka hadi’a moris. Iha ne’ebá mosu domin no iha paixaun ba bola, nune’e nunka para halimar no joga bola.
Iha tinan-11, Claudio Osorio muda ba Inglatera. Iha ne’e, ho inisiativa no hakarak rasik buka klube atu bele joga. Ikusmai, nia hetan duni klube lokál ida naran “Greater Leys”, iha Reading FC. Nia joga iha klube ne’e durante tinan-10. Nune’e mós joga iha U-15.
Esperiénsia
Futebolista, 07/2019 – to’o agora;
Indústria futebol – Oxford, Inglatera.
- Hahú Reading FC dezde U-11, no iha klube besik tinan-10;
- U-15 inglatera;
- Asina kontratu profisionál primeiru iha tinan-17 iha veraun iha loron 25 jullu 2019 (Tinan tolu kontratu profisionál);
- Nia estréia (debut) profisionál ba dala-uluk iha veraun tinan-2021, ho tinan-19 iha Kopa Carabao, maibé halo de’it aparénsia dala-rua ba ekipa primeira. Ida iha kopa Carabao no kopa FA kontra Swansea City (Kopa Caraba, Kidderminister) kopa FA;
- Nu’udar inisiadór (starter) ba U-18 no U-23;
- Sai empréstimu ba Cobh rambler (Liga Irlanda, joga dala-sia);
Abilidade
- Jogadór kreativu, bele halimar nu’udar médiu (midfield);
- Bele kria no oferese golu;
- Iha konsiénsia di’ak ba espasu iha kampu;
- Korajozu hodi kaer bola, la importa iha ne’ebé de’it mak iha kampu-laran;
- Aprendiz rápidu ba jogu. Foti desizaun bainhira pasa, dribla ka suta;
- Koñese regra no responsabilidade sira ne’ebé fó bainhira tama iha kampu;
- Di’ak iha variedade pasa oion;
Bolu mós jogadór seluk
Alende jogadór Claudio Osorio, treinadór Simón mós sei bolu jogadór timoroan sira ne’ebé joga iha liga estranjeiru, Mouzinho Barreto, Jhonfrit, Jenivio Mota, Paulo Gally no seluktan.
Ho jogadór ne’ebé iha treinadór nasionalidade Xile ne’e fiar katak sei hadi’a Timor-Leste nia prestasaun jogu iha nível internasionál ne’ebé antes ne’e monu.
Maske hili jogadór profesionál hirak ne’e, daudaun ne’e treinadór ne’e halo hela selesaun ba jogadór klube 16 ne’ebé daudaun ne’e joga hela iha kopa Federasaun Futeból Timor-Leste (FFTL).
Jornalista: Hortencio Sanchez
Editór: Rafael Ximenes de A. Belo
